Memlekettik kirister komıteti «Dostyq» keden beketi týraly daýǵa pikir bildirdi
Buǵan deıin áleýmettik jelide «Dostyq» keden beketinen júk alyp ótý úshin 1000$ para berýiń kerek» degen aqparat shyqqan edi.
«QR Prezıdentiniń tapsyrmasyn oryndaý maqsatynda 2022 jylǵy 23 qarashada «Dostyq-avtomobıl» ótkizý pýnktinde «CargoRuqsat» platformasynda elektrondyq kezek júıesi iske qosyldy. Avtokólikterdi memlekettik shekara arqyly ótkizýdiń dástúrli ádisine qaraǵanda bul júıeni engizýdiń artyqshylyǵy kóp. «Dostyq-avtomobıl» ótkizý pýnktinde elektrondyq kezek júıesin engizý kezinde Eýrazııalyq ekonomıkalyq odaqtyń basqa memleketteriniń tájirıbesi eskerildi», - dep jazylǵan Memlekettik kirister komıtetiniń resmı jaýabynda.
2022 jylǵy 27 jeltoqsanda elektrondyq ruqsattamalar boıynsha – 3 211 bos avtokólik kirgen. Ortasha alǵanda, QHR-ǵa táýlik saıyn 120 bos avtokólik ótip jatyr, al ótkizý pýnktiniń ınfraqurylymdyq ótkizý qabileti táýligine 70 avtokólikti quraıdy.
«Alaıda, deldaldyq qyzmetpen aqsha tabatyn keı adamdar (júk tasýshylar) elektrondy kezekti ádeıi dıskredıtatsııalap, bekettiń ótkizý qabiletin arttyrýǵa barlyq jaǵynan kedergi keltirýde. Sondaı-aq, «CargoRuqsat» elektrondy kezek júıesinde tirkelmegen nemese memlekettik shekarany kesip ótý úshin keıingi merzimge tirkelgen avtokólikter anyqtalady. Budan basqa, «Dostyq avtomobıl ótkizý pýnkti aldynda jasandy túrde kezekter jasalady, zańdy tirkelgen avtokólikterge kedergi jasaý áreketteri baıqaldy», - delingen habarlamada.
Sonymen birge, jergilikti atqarýshy jáne memlekettik organdardyń basshylary turaqty negizde túsindirý jumystaryn júrgizedi, tasymaldaýshylar men syrtqy ekonomıka qatysýshylary úshin aqparat chatqa jiberiledi. Birlesken jumysqa Dostyq kólik prokýrory, QR UQK Shekara qyzmetiniń basshylyǵy, Dostyq aýylynyń patrýldik polıtsııa bóliminiń basshylyǵy, Dostyq aýyldyq okrýgi ákimi apparatynyń basshylyǵy qatysady.
«Quqyq qorǵaý organdarynyń qyzmetkerleri Dostyq aýylynan shekaraǵa deıingi trassada táýlik boıy kezekshilik júrgizedi. Qazirgi ýaqytta jaǵdaı turaqty, áleýmettik shıelenis joq», - deıdi Memlekettik kirister komıteti.