Memlekettik qaryz jalpy ishki ónimge shaqqanda 25 paıyzdan tómen deńgeıde – Erulan Jamaýbaev

ASTANA. QazAqparat – Memlekettik qaryz jalpy ishki ónimge shaqqanda 25 paıyzdan tómen deńgeıde. Bul týraly Parlament palatalarynyń birlesken otyrysynda Úkimettiń jáne Joǵary aýdıtorlyq palatanyń 2022 jylǵy respýblıkalyq bıýdjettiń atqarylýy týraly esepterin qarastyrý kezinde Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Memlekettik boryshqa qatysty aıtatyn bolsaq, qazirgi kezde barlyq belgilengen kovenanttar saqtalǵan. Memlekettik qaryz jalpy ishki ónimge shaqqanda 25 paıyzdan tómen deńgeıde qalyptasqan. Qarjylyq shekteýlerdi qatań saqtaý saıasaty keleshekte de jalǵastyrylatyn bolady. Bul másele Úkimettiń turaqty baqylaýynda. Biz qabyldanǵan mindettemelerdiń ashyqtyǵy men aıqyndyǵyn arttyrý boıynsha Joǵary aýdıtorlyq palatanyń usynymdaryn qoldaımyz. Olar jumys barysynda eskeriletin bolady», - dedi Qarjy mınıstri.

Budan buryn habarlanǵandaı, mınıstr byltyr memleket óziniń áleýmettik jáne basqa da mindettemelerin tolyq kólemde oryndaǵanyn aıtty.