Memlekettik hatshy tehnıkalyq mamandardy daıarlaý baǵytynda birqatar tapsyrmalar berdi (FOTO)

ASTANA. QazAqparat - Búgin Halyqaralyq áıelder kúni qarsańynda QR Memlekettik hatshysy Gúlshara Ábdiqalyqova «QazTehEkspo» saýda-óndiristik kesheninde áıelder qaýymymen kezdesti. Bul keshendegi jumysshylardyń 70 paıyzdan astamy názik jandylar.

«Qazir Elbasy úlken maqsat júktep otyr, ıaǵnı 30 damyǵan eldiń qataryna kirýimiz qajet. Bul turǵyda adamı kapıtaldy damytýǵa erekshe mán berilýde. Sondyqtan qajetti memlekettik ınvestıtsııalar salynýda», - dep toqtaldy Memlekettik hatshy.

Osy oraıda G. Ábdiqalyqova 2015-2019 jyldarǵa arnalǵan Indýstrııalyq-ınnovatsııalyq damý memlekettik baǵdarlamasy aıasynda ekonomıkanyń alty negizgi salasy úshin 10 jetekshi kolledj jáne 10 joǵary oqý orny bilikti kadrlardy daıarlap, keıinnen atalǵan tájirıbe elimizdiń basqa da oqý oryndaryna taralatyny jóninde aıtty.

Kezdesý barysynda Memlekettik hatshy áıelder qaýymyn Halyqaralyq áıelder kúnimen quttyqtady. «QazTehEkspo» óndiriste jańa tehnologııalardy paıdalana otyryp, mashına jasaý men toqyma ónerkásibi boıynsha dýaldy oqytý úderisine, kásiptik standarttar men bilim berý baǵdarlamalaryn ázirleýge belsendi qatysýda. Budan bólek, kolledjder men joǵary oqý oryndaryna tájirıbelik alańdaryn usynyp otyr.

Atap aıtqanda, kezdesýden keıin atalǵan keshende ótken keńes barysynda G. Ábdiqalyqova memlekettik organdardyń ókilderine birqatar tapsyrmalar berdi.

QR BǴM baspasóz qyzmetiniń málimetinshe, bilim alýshylar arasynda kásiptik baǵdarlaý jumysyn júrgizý úshin olardyń kásibı tańdaýyna kómek kórsetýge, olardyń bolashaǵyn aıqyndaýyna, sondaı-aq eńbek pen kásiptik oqytýǵa qajetti jaǵdaı jasaý turǵysynda elimizdiń 9 óńirinde 5-11 synyptardyń 20 myńnan astam oqýshysyn qamtı otyryp, 29 oqý-ádistemelik kombınat jumys atqarýda.

Qazirgi kezde eńbek naryǵyndaǵy bos orynnyń 70 paıyzdan astamyn jumysshy jáne tehnıkalyq mamandar qurap otyr.