Memlekettik hatshy: Tarıhymyzdy bizdiń dáýirimizdiń birinshi myńjyldyǵyna deıin keńeıtý ulttyq tarıhqa jańasha qaraýǵa múmkindik beredi
«Jınaqtalǵan tarıhı faktiler men materıaldyq mádenıettiń jádigerleri, nyshandyq máni bar úlgiler men ádet-ǵuryptardy zertteý, fılologııa men lıngvıstıkanyń málimetteri, tarıhı geografııa men demografııa, zertteýdiń tyń tásilderi, pánaralyq kózqarastar - bulardyń bári bizge qazaqtardyń etnogenezi buǵan deıin tarıh ǵylymy udaıy paıymdap kelgen kezden anaǵurlym erte qalyptasqan dep boljam jasaýǵa múmkindik beredi. Etnos kókjıegin bizdiń dáýirimizdiń birinshi myńjyldyǵyna deıin keńeıtý jáne ony ǵylymı turǵydan ornyqtyrý búkil ulttyq tarıhqa jańasha qaraýǵa múmkindik beredi. Sondaı-aq, bul bizdiń halqymyzdyń jer sharynyń osynaý aýqymyn alyp jatqan óńirdegi alatyn naqty orny týraly túsinigimizdi ózgertýge septigin tıgizbek. Munyń ózi ulttyq sáıkestiktiń mańyzdy faktoryna aınalyp, ulttyq sana-sezimimizdi qaǵıdatty túrde ózgertedi», - dedi M. Tájın.
Budan bólek, Memlekettik hatshy qazirgi tarıhymyzdyń mán-maǵynasyn júıeli, ǵylymı negizde túsinip alý kerektigin atap ótti. «Táýelsiz egemen memlekettiń ómirinde úshinshi onjyldyq bastaldy. Osy jyldarda rasynda da ǵasyrlarǵa tatıtyn joldan óttik. Oıymyzdy jınaqtaıtyn kez jetti. Qazaqstannyń ótpeli kezeńiniń ereksheligi nede edi, qalyptasqan memleket degenimiz ne, naqty táýelsizdiktiń negizgi belesteri qandaı, qandaı qaýip-qaterlerden óttik, qoǵamnyń ekonomıkalyq, saıası jáne mádenı júıesi qalaı quryldy? Osy suraqtardyń bárine dáıekti ári anyq jaýap berý - tarıhshylardyń kásibı qoǵamdastyǵynyń mindeti», - dedi Memlekettik hatshy.