Memlekettik hatshy otbasyny qoldaýǵa qatysty tapsyrmalar berdi
Otyrysty ashqan Memlekettik hatshy Elbasy Nursultan Nazarbaevtyń bastamasy boıynsha saıası reforma, ekonomıkalyq jańǵyrý jáne qoǵamdyq sanany jańǵyrtý qadamdary boıynsha qajetti jumystar iske asyrylyp jatqandyǵyn atap ótti. Osy oraıda adamdardyń boıyna rýhanı qundylyqtardy qalyptastyrýda aıqyndaýshy ról otbasy ınstıtýtyna tıesili. Otbasy memlekettiń negizi retinde asa erekshe nazardy jáne qamqorlyqty, azamattardyń ómir súrý sapasy men deńgeıin jaqsartýdy talap etedi.
Budan bólek, otyrysta otbasyn, ana men balany, múmkindigi shekteýli balalary bar otbasylardy qoldaý jónindegi memlekettik sharalar kesheni týraly másele qaraldy. QR Eńbek jáne halyqty áleýmettik qorǵaý mınıstrliginiń aqparatyna qaraǵanda, Qazaqstanda týýdy yntalandyrý men otbasynda balalardy tárbıeleýge járdemdesýge, kóp balaly analardyń bedelin arttyrýǵa, múgedek balalar men olardyń otbasylaryn, sondaı-aq az qamtylǵan shańyraqtardy qoldaýǵa baǵyttalǵan memlekettik járdemaqylar men tólemder júıesi aıasyndaǵy balaly otbasyny qoldaýdyń ulttyq modeli ázirlengen.
Atap aıtqanda, Prezıdenttiń tapsyrmasy boıynsha bıylǵy 1 shildeden bastap balanyń týýyna baılanysty birjolǵy járdemaqy mólsheri 20 paıyzǵa kóbeıtiletin bolady. Buǵan qosa, 2018 jylǵy 1 qańtardan bastap eń tómengi kúnkóris mólsheri qaıta qaralady. Bul 3 mıllıon azamat úshin bazalyq zeınetaqylardyń, múgedekterge, asyraýshysynan aıyrylǵan otbasylarǵa arnalǵan járdemaqylardyń, sonymen qatar múgedek balalardy tárbıeleýshilerge arnalǵan ataýly kómek pen járdemaqylardyń deńgeılerin arttyrýǵa múmkindik beredi.
Munymen qosa otyrys barasynda balalardy zorlyq-zombylyqtan jáne BAQ pen áleýmettik jeliler, áleýmettik jarnama arqyly zııandy aqparattan qorǵaý jónindegi memlekettik sharalar talqylandy. Ábdiqalyqova memlekettik organdarǵa birqatar tapsyrmalardy júktedi.