Memlekettik hatshy QR BǴM-ge 25 maýsymǵa deıin barlyq balabaqshalarǵa jan-jaqty aýdıt júrgizýge tapsyrdy

ASTANA. QazAqparat - Áıelder árqashan da tártiptiligimen úlgi bolýy tıis. Bul týraly búgin QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń kezekti otyrysynda QR Memlekettik hatshysy Gúlshara Ábdiqalyqova málim etti.

Jaqynda Almatyda balabaqshada ólimmen aıaqtalǵan qaıǵyly oqıǵaǵa toqtalǵan Memlekettik hatshy, búginde ata-analar balasyn balabaqshaǵa jibergende onyń qaýipsizdigine tolyq senimmen qaraı almaıtyndyǵyn atap ótti. ıAǵnı, kúrke, dýal, aǵash qulaýy múmkin nemese avtokólik basyp ketýi yqtımal.

«Sonymen birge jol júrý erejesin buzý jaǵdaılary, ásirese áıelder tarapynan jıilep ketti. Máselen, bıylǵy mamyrdyń basynda Almatyda kólikti basqarýǵa kýáligi joq áıel alkogoldik ishimdikke masaıǵan kúıinde mashınaǵa otyryp, jaıaý júrginshini qaǵyp ketýi saldarynan 4 aılyq bala mert boldy. Bul jan túrshigerlik oqıǵalar»,-dedi G. Ábdiqalyqova.

Osy oraıda Memlekettik hatshy Ulttyq komıssııa músheleriniń atalǵan jaǵdaılarǵa erekshe mán berýi kerektigin aıta kele, áıelder birinshi kezekte tártiptiliktiń, uıymdastyrýshylyqtyń, zańǵa baǵynýshylyqtyń, sondaı-aq joǵary mádenıettiligimen úlgi bolýy tıis ekenin atap ótti.

Budan bólek, G. Ábdiqalyqova balalarǵa qatysty zorlyq-zombylyqtyń jıilep ketýinen qoǵamdaǵy narazylyq sezimi kúsheıip otyrǵandyǵyn atap ótti. Sondyqtan da osy másele boıynsha júıeli túrde muǵalimdermen, ata-analarmen, memlekettik organdarmen, azamattyq qoǵam ınstıtýttarymen, sondaı-aq osyndaı faktilerge jol bermeýge talpynys jasap otyrǵan barlyq taraptarmen aqparattyq-túsindirý jumystaryn júrgizý kerek.

Sóz sońynda Memlekettik hatshy Bilim jáne ǵylym mınıstrligine 25 maýsymǵa deıin respýblıka boıynsha barlyq mektepke deıingi jáne orta bilim uıymdarynyń tyńǵylyqty aýdıtin jan-jaqty júrgizýge tapsyrdy. Jazǵy mektep kanıkýlyna baılanysty jazǵy saýyqtyrý maýsymynda balalardyń qaýipsizdigine erekshe nazar aýdarýdy júktedi.