Memlekettik hatshy: Qazaq ultynyń qalyptasý úderisi jetkilikti túrde zerttelmeı otyr

ASTANA. 5 maýsym. QazAqparat - Qazaq ultynyń qalyptasý úderisi jetkilikti túrde zerttelgen emes. Búgin Elordadaǵy Eýrazııa ulttyq ýnıversıtetinde Qazaqstan Respýblıkasynyń ulttyq tarıhyn zerdeleý jónindegi vedomstvoaralyq jumys tobynyń keńeıtilgen otyrysynda QR Memlekettik hatshysy Marat Tájın osylaı málim etti.

Memlekettik hatshynyń aıtýynsha, búgingi Qazaqstan terrıtorııasynyń aýqymdy bóligi bir jyldary qazaq ultyn qalyptastyrǵan taıpalardyń tarala ornalasýyn aıǵaqtaıdy. «Onda da sózsiz bundaı taıpalar XV ǵasyrda bir sátte-aq bir ǵana ult bolyp toptasa, qalyptasa qoımaǵany ábden aıqyn. Qazaq ultynyń qalyptasýy - bir ǵana myńjyldyqtardy qamtıtyn úderis emes. Alaıda, bul jetkilikti túrde zerttelmeı otyr», - dedi M. Tájın.

Bul rette Memlekettik hatshy «Deshti qypshaq» dalasyndaǵy ejelgi memleketterdiń qurylýy men ydyraýy, túrki, qypshaq halyqtarynyń taralý aýqymy sekildi kúrdeli ári aýqymdy taqyryptardy ǵalymdar jańa ádistemelik pozıtsııa turǵysynan áli de qarastyrmaǵanyn atap ótti. «Osy turǵydan alǵanda biz saq mádenıetin, onyń ishinde Aral mańyn mekendegen massagetterdi, Jetisý jerinde ómir súrgen saqtardy, Altaıdaǵy uly taıpalardy júıeli túrde zertteýge tıispiz. Munda klassıka dáýirindegi eýropalyq avtorlardyń ǵana týyndylaryn oqyp, solarǵa súıený jetkiliksiz», - dedi Memlekettik hatshy.