Memlekettik hatshy: Elimizdiń árbir tórtinshi azamaty - kitaphana oqyrmany
Gúlshara Ábdiqalyqova óziniń quttyqtaý sózinde QR Prezıdenti Nursultan Nazarbaev mádenıetti damytýdy memlekettik saıasattyń basymdyqtarynyń biri retinde bekitkenin atap ótti. «Biz mádenıetti basqarýdyń qazirgi zamanǵy úlgisin qurýdamyz, ol Qazaqstan Respýblıkasynyń álemdegi eń damyǵan 30 memleketiniń qataryna enýine yqpal etetin bolady.
Búginde elimizde Mádenı saıasat tujyrymdamasy tabysty iske asyrylýda. 700-den astam baspalar men kitap shyǵarýshy uıymdar jemisti jumys júrgizýde. 11 myńnan astam kitaphanalardyń esigi aıqara ashyq. Memleket basshysynyń tapsyrmasy boıynsha
jalpy kólemi 18 myń bıblıografııalyq jazbalardy quraıtyn Qazaq ulttyq elektrondyq kitaphanasynyń qory satylap ulǵaıtylýda. Búgingi tańda elimizdiń árbir 4-i azamaty oqyrman sanalady», - dedi Memlekettik hatshy.
Іs-shara Qazaqstan Táýelsizdiginiń 25 jyldyǵyn merekeleý aıasynda ótkizildi. Ol TMD, Eýropa jáne Azııa memleketteriniń baspa, kitap saýdasy, ǵylym, bilim berý jáne polıgrafııalyq kompanııalaryn úlken zııatkerlik alańǵa toptastyrýǵa baǵyttalǵan. Kitap kórmesine jaqyn jáne alys shetelderdiń 20 elinen, onyń ishinde Qazaqstan, Reseı, Belarýs, Qytaı, Germanııa jáne t.b. elderdiń 80-nen astam kompanııasy qatysýda.
Eýrazııalyq halyqaralyq kitap kórme-jármeńkesin ótkizý ıdeıasy Memleket basshysynyń «100 naqty qadam» Ult josparynyń aıasynda Astanany Eýrazııanyń iskerlik, mádenı jáne ǵylymı ortalyǵyna aınaldyrý boıynsha iske asyrylýda.
«Eurasian Book Fair - 2016» Eýrazııalyq halyqaralyq kitap kórme-jármeńkesin aralaý barysynda Memlekettik hatshy usynylǵan kitaptar ekspozıtsııalarymen tanysty jáne kórmeniń Frankfýrt, Máskeý, Beıjiń sııaqty iri kitap kórme-jármeńkeleriniń deńgeıine kóterilýine tilektestik bildirdi.