Memlekettik hatshy EQQDB ókilderimen áıelder bıznesin qoldaý baǵytyn talqylady

ASTANA. QazAqparat - Búgin Aqordada QR Memlekettik hatshysy Gúlshara Ábdiqalyqova Eýropa qaıta qurý jáne damý bankiniń energetıka men tabıǵı resýrstar jónindegi basqarýshy dırektory Nandıta Parshadpen kezdesti, dep habarlaıdy QazAqparat.

Taraptar iri ınfraqurylymdyq jobalardy iske asyrý salasyndaǵy ózara tıimdi yntymaqtastyqtyń birqatar ózekti jobalaryn talqylady.

«EQQDB-men bizde óte tyǵyz ózara qarym-qatynas ornaǵan jáne belsendi jobalar júzege asyrylýda. Yntymaqtastyqtyń 25 jylynda aýqymdy jumystar atqaryldy. 1992 jyldan bastap EQQDB Qazaqstanda 7 mlrd eýrodan astam qarjyny quraıtyn 222 jobany qarjylandyrdy»,-dedi Memlekettik hatshy.

Sonymen qatar qatar kezdesý barysynda tabıǵı resýrstar men energetıka sektoryndaǵy EQQDB jobalaryn iske asyrý baǵytyndaǵy, genderdik teńdik jáne áıelderdiń osy sektordaǵy rólin arttyrý máselesi qaraldy.

«Barlyq deńgeıde názik jandylarǵa qoldaý kórsetip, áıelder bıznesin damytýǵa kómek kórsetý sharalaryn jalǵastyramyz degen oıdamyn»,-dep atap ótti G. Ábdiqalyqova.

Belgili bolǵandaı, QR Úkimeti men EQQDB arasyndaǵy kelisim aıasynda «Áıel bızneste» atty joba iske asyrylýda. Búginde atalǵan baǵytta 7 myńnan astam shaǵyn jáne orta bıznes sýbektilerine 5,8 mlrd teńge kóleminde qaryz berildi. Bul rette qarjylandyrýmen qatar, áıelder basshylyq etetin kásiporyndarǵa basqarýshylyq tájirıbe men sońǵy býyndy tehnologııalardy engizýge kómek jasalýda.

Kezdesý barysynda Memlekettik hatshy G. Ábdiqalyqova N. Parshadty Eýropa qaıta qurý jáne damý bankiniń basqarýshy dırektory laýazymyna taǵaıyndalýymen quttyqtap, bıylǵy 31 tamyzda EKSPO-2017 aıasynda ótetin «Áıelder bolashaq energııasy úshin» atty halyqaralyq forýmǵa qatysýǵa shaqyrdy.