Memlekettik hatshy Armenııanyń jańadan taǵaıyndalǵan elshisin qabyldady
Kezdesý kezinde G.Ábdiqalyqova jańadan taǵaıyndalǵan elshini Qazaqstandaǵy qyzmetine kiriskenimen quttyqtap, eki eldiń yntymaqtastyǵyn nyǵaıtýǵa úles qosatynyna senim bildirdi.
«Sizdiń kelýińizben bizdiń qarym-qatynasymyz kúsheıe túsedi dep úmittenemin. Jalpy, Qazaqstan men Armenııa burynnan beri jaqsy aralasyp keledi. Tarıhı-mádenı baılanystarymyz da myǵym. Ujymdyq qaýipsizdik shart uıymy, Eýrazııalyq ekonomıkalyq odaq, Táýelsiz memleketter dostastyǵy aıasynda birlesip jumys isteımiz. Árıne, saýda-ekonomıkalyq baılanystarǵa basa mán beriledi. Sońǵy bir jyldyń ishinde atalǵan kórsetikish 20 protsentke ósti. Degenmen, ony áli de arttyrýǵa bolady. Qazir eki eldiń taýar aınalymy 10 mıllıon dollardan asady. Biraq osy kórsetkish budan da joǵary bolsa eken degen tilek bar», - dedi G.Ábdiqalyqova.
Memlekettik hatshy Qazaqstandaǵy armıan dıasporasyna da toqtaldy.
Onyń aıtýynsha, búginde árbir oblysta armıandardyń mádenı ortalyqtary bar.
«Qazaqstan halqy Assambleıasy aıasynda úlken jumystar atqarylyp keledi. Bizde armıan ultynan bir áıel depýtatymyz bar. Jalpy, biz ekijaqty yntymaqtastyqty tereńdetýge ázirmiz», - dep atap kórsetti G.Ábdiqalyqova.
Aıta keteıik, ótken jyly qarasha aıynda Armenııanyń prezıdenti Armen Sarkııasıan Gagık Galachıandy osy eldiń Qazaqstandaǵy jáne Qyrǵyzstandaǵy elshisi qyzmetine taǵaıyndady. Al 12 jeltoqsanda elshi QR Prezıdenti Nursultan Nazarbaevqa senim gramotasyn tapsyryp, Qazaqstandaǵy qyzmetine resmı túrde kirisken bolatyn.