Memlekettik fýnktsııalarǵa jaýapty adamdardyń kóleńkeli kirisin anyqtaý tetikteri kúsheıtildi

ASTANA. QazAqparat – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine sybaılas jemqorlyqqa qarsy is-qımyl jáne memlekettik qorǵaýǵa jatatyn adamdardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, qabyldandy, dep habarlaıdy QazAqparat tilshisi.

Bul qujat zańnamany odan ári jetildirý jáne halyqaralyq ozyq standarttar negizinde sybaılas jemqorlyqtyń aldyn alý quraldaryn engizý arqyly jemqorlyqqa qarsy is-qımyldyń tıimdi júıesin qalyptastyrýǵa baǵyttalǵan. Zań jobasy 11 zańnamalyq aktige, onyń ishinde 3 kodeks pen 8 zańǵa túzetýlerdi qamtyp otyr.

Zań jobasynyń negizgi mindetteri - memlekettik fýnktsııalardy oryndaýǵa ýákilettik berilgen jáne olarǵa teńestirilgen adamdardyń negizsiz baıýyn baqylaýdyń aldyn alý sharalary arqyly sybaılas jemqorlyq kórinisterin barynsha azaıtý, sondaı-aq sybaılas jemqorlyq faktileri týraly habarlaǵan adamdardy tıisinshe qorǵaýdy, onyń ishinde olardyń eńbek quqyqtaryna nuqsan kelmeýine jáne berilgen aqparattyń qupııalylyǵyna kepildik berý arqyly qamtamasyz etý.

Zań jobasyn qabyldaý:

- memlekettik fýnktsııalardy oryndaýǵa ýákilettik berilgen jáne olarǵa teńestirilgen adamdardyń kóleńkeli kiristerin anyqtaýdy;

- memlekettiń sybaılas jemqorlyqqa qarsy saıasatynyń ashyqtyǵyn;

- memlekettiń áleýmettik-ekonomıkalyq damýy úshin teris faktor retinde sybaılas jemqorlyqty azaıtýdy;

- sybaılas jemqorlyqqa qarsy is-qımylda azamattyq qoǵamnyń belsendiligin arttyrýdy;

- sybaılas jemqorlyqqa qarsy mádenıetti qalyptastyrýdy qamtamasyz etýge múmkindik beredi.