Memlekettik eńbek ınspektorlary 5,5 myńnan astam jumyskerdiń quqyǵyn qorǵady
10:04, 09 Sáýir 2021
NUR-SULTAN. QazAqparat - 1 sáýirdegi jaǵdaı boıynsha Memlekettik eńbek ınspektorlary respýblıkanyń 321 kásipornynda 6,4 myń jumyskerdiń aldynda 1,007 mlrd teńgeden astam somaǵa jalaqy boıynsha bereshekti anyqtady. Bul týraly QazAqparat QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap habarlaıdy.
Osy kásiporyndardyń basshylaryna oryndalýy mindetti 254 nusqama berilip, 27,3 mln teńgeden astam somaǵa aıyppul salyndy.
Qabyldanǵan sharalar, sonyń ishinde jalaqy boıynsha bereshekti óteýdiń qatań kesteleri men merzimderin belgileý nátıjesinde 5,5 myńnan astam jumyskerdiń quqyqtary qorǵaldy. Olarǵa 947,9 mln teńge tólendi.