Memlekettik bıýdjettiń 7 aıdaǵy kirisi – 8,4 trln teńge

NUR-SULTAN. QazAqparat – QR Premer-Mınıstriniń orynbasary, Qarjy mınıstri Erulan Jamaýbaev 7 aıdyń qorytyndysy boıynsha memlekettik qarjynyń atqarylý kórsetkishterin baıandady, dep habarlaıdy QazAqparat tilshisi.

Mınıstrdiń aıtýynsha, memlekettik bıýdjetke 8 trln 463 mlrd teńge kiris tústi nemese jospar 105,1%-ke oryndalǵan. Al, respýblıkalyq bıýdjetke 5,6 trln teńge shamasynda kiris tústi nemese jospar 101,3%-ke oryndaldy.

«Kirister boıynsha jospar 72 mlrd teńgege, onyń ishinde salyq – 18 mlrd teńgege, salyqtyq emes kirister – 54 mlrd teńgege asyra oryndaldy. Salyqtar boıynsha asyra oryndaýdyń negizgi somasy ishki óndiris taýarlaryna salynatyn qosylǵan qun salyǵyna jáne shıki munaıǵa eksporttyq kedendik bajǵa tıesili boldy», - dedi Qarjy mınıstri Úkimettiń búgingi otyrysynda.

Onyń aıtýynsha, ishki óndiris taýarlaryna qosylǵan qun salyǵy boıynsha jospardyń asyra oryndalýy bıylǵy 6 aıdaǵy jumystardy atqarý, qyzmet kórsetý jáne taýarlardy ótkizý boıynsha aınalym somalarynyń 18,4%-ke ulǵaıýyna baılanysty.

Shıki munaıǵa eksporttyq kedendik baj boıynsha jospar shıki munaıdyń ortasha álemdik baǵasynyń ósýi, sondaı-aq teńgeniń AQSh dollaryna baǵamynyń álsireýi esebinen asyra oryndalǵan.

«Al, ımportqa qosylǵan qun salyǵy jáne ımporttyq kedendik baj boıynsha jospar oryndalmady. Bul geosaıası jaǵdaıǵa jáne sanktsııalarǵa baılanysty bolyp otyr. Jergilikti bıýdjetter kirisi 113,3%-ke atqaryldy jáne 2 trln 864 mlrd teńge boldy. Jospar 336 mlrd teńgege, onyń ishinde salyqtar boıynsha – 318 mlrd teńgege asyra oryndaldy. Kirister boıynsha josparlar Túrkistan (22 mlrd teńge) jáne Mańǵystaý (10 mlrd teńge) oblystarynan basqa barlyq óńirlerde asyra oryndaldy», - dedi E. Jamaýbaev.