Memlekettik bıýdjetti ıgerýde Parlamenttiń baqylaýyn kúsheıtý mańyzdy – Marat Báshimov
«Meniń oıymsha, Memleket basshysynyń bıylǵy Joldaý revolıýtsııalyq baǵytta boldy. Prezıdent qoǵamnyń, halyqtyń pikirin Joldaý arqyly jetkizdi. Konstıtýtsııamyzǵa memlekettilik, basqarý qurylymy asa mańyzdy ózgerister engiziledi. Bul degenimiz Parlamenttiń róli men baqylaýyn kúsheıtý. Ásirese memlekettik bıýdjetti ıgerýde Parlamenttiń baqylaýyn kúsheıtý mańyzdy. Parlamentke jańa ókilettiktiń berilýi dál qazir Qazaqstan úshin ózekti», - dedi Marat Báshimov Memleket basshysynyń jańa joldaýyn talqylaýǵa arnalǵan shara barysynda.
Sondaı-aq, sarapshy Konstıtýtsııalyq Keńestiń ornyna Konstıtýtsııalyq sot qurýdyń mańyzdylyǵyn atap ótti.
«Konstıtýtsııalyq keńestiń fýnktsııalary áli kúnge deıin tolyq kólemde iske asyrylmaı keledi. Jańa ózgeristerge saı adam quqyqtary jónindegi ýákil men bas prokýrorǵa jańa múmkindikter beriledi. Endigi ýaqytta quqyǵy buzylǵan azamattar tikeleı konstıtýtsııalyq sotqa júgine alady. Sonymen qatar Prezıdent jańa Joldaýynda qazaqstandyqtardyń jeke bas quqyǵymen qatar ekonomıkalyq, saıası jáne áleýmettik quqyǵynyń da teń qorǵalýyna toqtalyp ótti», - deıdi ol.
Eske sala ketsek, QR Prezıdenti keshe halyqqa Joldaýynda Qazaqstannyń sýperprezıdenttik basqarý formasynan kúshti Parlamenti bar prezıdenttik respýblıkaǵa kóshý máselesin kóterdi. Memleket basshysynyń aıtýynsha, Parlamenttiń rólin kúsheıtý mindeti tur.
Aıta keteıik, búgin QR Prezıdenti janyndaǵy ortalyq kommýnıkatsııalar qyzmeti alańynda otandyq sarapshylar Memleket basshysynyń halyqqa arnalǵan jańa Joldaýyn talqyǵa saldy.