Memlekettik bıýdjetten qarjylandyrylatyn áleýmettik jobalardy tańdaý máselesi ÚEU-larǵa tapsyrylýy tıis - A.Soloveva

ASTANA. Shildeniń 23-i. QazAqparat /Gúlmıra Álıakparova/ - Memlekettik bıýdjetten qarjylandyrylatyn áleýmettik mańyzy bar jobalardy tańdaý máselesi úkimettik emes uıymdarǵa tapsyrylýy tıis. Bul týraly búgin Astanada ótip jatqan ÚEU-lardyń beıresmı konferentsııasy barysynda jýrnalısterge bergen suhbatynda Qazaqstannyń Azamattyq alıansynyń prezıdenti, QR Parlamenti Májilisiniń depýtaty Aıgúl Soloveva málim etti.

A.Soloveva, qazirgi ýaqytta Azamattyq alıans, Qazaqstannyń jalpy ishki óniminiń qurylymynda úkimettik emes uıymdardyń qosyp jatqan úlesi de eseptelýi tıistigi máselesin kóterip otyrǵandaryn aıtty. «Sebebi, bul arzan eńbek. Olardyń arasynda eriktilerdiń tegin atqarǵan jumystary da bar. Osylardyń barlyǵy eseptelgen jaǵdaıda, biz qandaı sapaǵa qol jetkizip otyrǵanymyz aıqyn bolar edi», - deıdi.

Aıta keteıik, jyl saıyn ÚEU-lardyń áleýmettik mańyzy bar jobalaryn qarjylandyrýǵa memlekettik jáne jergilikti bıýdjetten shamamen barlyǵy 1,5 mıllıard teńge bólinedi. Onyń syrtynda bıznestiń áleýmettik jaýapkershiligi aıasynda júzege asyrylyp jatqan jobalar bar.