Memlekettik bıýdjetke salyq túsimderiniń ósý qarqyny 14 paıyzdy qurady – Smaıylov

NUR-SULTAN. QazAqparat - Memlekettik bıýdjet kiristeri boıynsha jospar 101 paıyzǵa oryndaldy. Bul týraly búgin Úkimet otyrysynda «Salyq jáne kedendik ákimshilendirý» taqyrybynda baıandama jasaǵan QR Premer-Mınıstriniń Birinshi orynbasary – Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Memlekettik bıýdjettiń kiristeri boıynsha jospary 101 paıyzǵa oryndaldy nemese jospardan tys 76 mlrd teńge tústi. Ótken jyldyń osyǵan uqsas kezeńimen salystyrǵanda túsimderdiń ósimi 14 paıyzǵa nemese 911 mlrd teńgege ósti. Memlekettik bıýdjetke salyq túsimderiniń ósý qarqyny 14 paıyzdy qurady. Ol ótken kezeńmen salystyrǵanda 886 mlrd teńgege artyq», - dedi ol.

Onyń dereginshe, ishki tutyný taýarlaryna qosylǵan qun salyǵy boıynsha 282 mlrd teńgege, korporatıvtik tabys salyǵy 194 mlrd teńgege jáne eńbekaqy qorynan salyqtar boıynsha 95 mlrd teńgege óskeni baıqalady. Sondaı-aq kedendik tólemder de ósti. EýrAzEQ-ten qosylǵan qun salyǵy boıynsha 88 mlrd. teńgege jáne úshinshi elderden QQS 73 mlrd teńgege artty.

«Keltirilgen nátıjeler fıskaldyq ákimshilendirýdi arttyrýǵa baǵyttalǵan memlekettik kiris organdarynyń jumys strategııasy durys ekendigin bildiredi. 2019 jylǵa arnalǵan respýblıkalyq bıýdjet kiristeriniń naqtylanǵan boljamy 7 trln 81 mlrd teńge somasynda aıqyndaldy. 2018 jyldyń faktisine kiristerdiń 1 trln 233 mlrd teńgege nemese 121 paıyzǵa, onyń ishinde: ekonomıkanyń jáne eksporttyq taýarlar baǵasynyń ósýine baılanysty 393 mlrd teńgege; salyqtyq jáne kedendik ákimshilendirýdi jaqsartýǵa jáne olardy tsıfrlandyrýǵa baılanysty 840 mlrd teńgege jyl qortyndysy boıynsha ósýi boljanyp otyr», - dedi Á.Smaıylov.

Sonymen qatar ol táýekelderdi basqarýdyń júıesi jetildirilip jatqanyn aıtty. Bul baqylaý jasaý úshin sýbektilerdi barynsha dál irikteýge múmkindik berdi jáne júrgizilip jatqan is-sharalardyń nátıjeligin arttyrady. Nátıjesinde salyqtyq tekserýlerdiń qorytyndylary boıynsha anyqtalǵan buzýshylyqtardyń somasy 20 paıyzǵa ulǵaıdy. Qashyqtan baqylaý ádisteri de jetildirilýde.

«Aǵymdaǵy jyly elektrondy shot-faktýralardy qoldana otyryp, kameraldyq baqylaýdyń jańa rásimderi engizildi. Qosymsha 221 mlrd teńge esepteldi - ósim 19 paıyz. 175 mlrd teńge óndirilip alyndy. Sondaı-aq bıýdjetke salyq tóleýdi yntalandyrý sharalary qabyldanýda», - dedi mınıstr.