Memlekettik bıýdjetke 5,5 trln teńge tústi – Qarjy mınıstrligi
«8 aıdyń qorytyndysy boıynsha memlekettik bıýdjetke 5,5 trln teńge somasynda kiris tústi nemese jospar 95,5% atqaryldy. Respýblıkalyq bıýdjetke 3 trln 455 mlrd teńge tústi nemese jospar 85% atqaryldy. Kiris boıynsha jospardyń atqarylmaýy 610 mlrd teńgeni qurady. Negizgi atqarylmaý somalary qosylǵan qun salyǵy jáne korporatıvtik tabys salyǵyna tıesili», - dedi mınıstr Úkimet otyrysyndaǵy baıandamasynda.
Onyń aıtýynsha, korporatıvtik tabys salyǵynyń atqarylmaýyna birneshe faktor áser etti: negizgi eksporttyq pozıtsııalar boıynsha baǵanyń orta eseppen 14,4%-ke quldyraýy; 854 iri salyq tóleýshi boıynsha málimdelgen avanstyq tólemder somasynyń ótken jyldyń 8 aıymen salystyrǵanda 229,2 mlrd teńgege tómendeýi jáne ekinshi deńgeıli bankter túsiminiń 9 mlrd teńgege azaıýy.
«Qosylǵan qun salyǵy boıynsha jospardyń negizgi atqarylmaý sebepteri: ótken jylǵy kezeńmen salystyrǵanda QQS qaıtarýdyń 63,4% nemese 201,8 mlrd teńgege ósýi; «Elektrondyq shot-faktýralar» aqparattyq júıe derekteri boıynsha satý aınalymdarynyń 11,6% azaıýy. Negizgi tómendeý taý-ken ónerkásibi salasyna tıesili, onda aınalymdar 2019 jylǵy kezeńmen salystyrǵanda 33,2% nemese 3,9 trln teńgege azaıǵan; Karantın rejıminiń engizilýine baılanysty iskerlik belsendilik tómendep, shamamen 20,6 myń salyq tóleýshi tólemderin 265 mlrd teńgege tómendetti; 2019 jylǵy 7 aımen salystyrǵanda Qazaqstannyń úshinshi eldermen taýar aınalymynyń 10,5%, Eýrazııalyq Ekonomıkalyq Odaq elderimen 2019 jyldyń 1 jartyjyldyǵymen salystyrǵanda 11% tómendeýi», - dep túsindirdi Qarjy mınıstri.