Memlekettik basqarýdyń jergilikti deńgeıinde de ózgerister qajet - Baýyrjan Ataýov
Bul týraly «KazIITÝ» ǵylym-bilim kesheni janyndaǵy memlekettik qyzmet jáne jumysqa ornalasý ınstıtýtynyń top menedjeri, Prezıdent janyndaǵy Memlekettik basqarý akademııasynyń túlegi, dotsent Baýyrjan Ataýov málim etti, dep habarlaıdy «QazAqparat» HAA tilshisi.
Onyń aıtýynsha, Elbasy usynyp otyrǵan reforma Parlament pen Úkimettiń rólin arttyrýdy, saıası júıeni demokratııalandyrýdy kózdeıdi. Ol úshin, árıne, Konstıtýtsııaǵa ózgerister men tolyqtyrýlar engizý qajet. Memleket basshysy atap ótkenindeı, Úkimet qurýda Parlamenttiń rólin, mınıstrlerdiń depýtattar aldyndaǵy jaýapkershiligin kúsheıtý asa mańyzdy. Parlamenttik saılaýda jeńiske jetken partııa Úkimet quramyn jasaqtaýǵa eleýli túrde áser ete alady. Úkimet ókilettiligin burynǵydaı Prezıdent emes, Parlamenttiń toqtatýy da yqpal etý tetigin nyǵaıta túspek. Bul jaǵdaıda depýtattardyń halyq aldynda bedeli ósip, qoǵamdyq pikirmen sanasa otyryp, qabyldanatyn sheshimderdiń bási artady.
«Óz kezeginde memlekettik qyzmetkerlerdiń bilimdi, mádenıetti, jan-jaqty bolýyna týra keledi. Halyqqa sapaly qyzmet kórsetý arqyly ǵana kásibı memleket qurýǵa bolady. Memlekettik basqarýdyń jergilikti deńgeılerinde bıýdjettik baǵdarlamalar ákimshisiniń jobalaryn, strategııalyq josparlardy, atqarýshy organdardyń esepterin talqylaýda qoǵamdyq uıymdardyń róli kúsheıe túsedi. Sonymen birge memlekettik basqarýdy jetildirý jáne memlekettik apparattyń ashyq jumysyn uıymdastyrý máseleleri boıynsha jeke jáne zańdy tulǵalardyń ótinishterin qaraý jáne ókilettikterdiń oryndalý qorytyndylary boıynsha da jumystar jańa sapalyq deńgeıge kóteriledi. Eń bastysy, bılik tarmaqtary ókilettilikteriniń aýysýy memlekettik basqarý júıesiniń jaqsarýyna oń áser etedi. Osy oraıda jergilikti ózin-ózi basqarýǵa baılanysty memlekettik qyzmetkerlerdiń bilimin jetildirý isine «KazIITÝ» janyndaǵy memlekettik qyzmet jáne jumysqa ornalasý ınstıtýty da óz úlesin qosa beretin bolady», dedi B.Ataýov.