Memlekettik basqarýdyń tetikterin tıimdi paıdalanýdyń mańyzy zor
Bul týraly Oral qalasy ákimdiginde «Qazaqstan Respýblıkasyndaǵy memlekettik basqarýdyń tıimdi tetikteri jáne esep berý kepildigi men ashyqtyǵy» degen taqyrypta ótip jatqan eki kúndik jıynda aıtyldy, dep habarlaıdy QazAqparat tilshisi.
QR Prezıdenti janyndaǵy Modernızatsııalaý boıynsha ulttyq komıssııa, QR Parlamentiniń Májilisi, Batys Qazaqstan oblysynyń ákimdigi, Din isteri jáne azamattyq qoǵam, Aqparat jáne kommýnıkatsııalar mınıstrlikteri, BUU-nyń Qazaqstandaǵy damý baǵdarlamasy (PROON) men EQYU-nyń Astanadaǵy baǵdarlamalar keńsesi uıymdastyrǵan jıynda oblys ákiminiń orynbasary Marat Toqjanovtyń atap ótkenindeı, Ult josparynda azamattyq qoǵamnyń qalyptasýyna, memlekettik basqarý isine turǵyndardyń belsene aralasýyna aıryqsha mán berilgeni belgili. Ult josparyna sáıkes 2015 jyldyń 2 qarashasynda «Qoǵamdyq keńester týraly» QR Zańy qabyldanyp, sonyń nátıjesinde oblystyq, qalalyq jáne aýdandyq qoǵamdyq keńester qurylyp, naqty jumystar atqarýda.
QR Parlamenti Májilisiniń depýtaty Qýanysh Sultanovtyń málim etkenindeı, «Aqparatqa qol jetkizý týraly» jáne «Qoǵamdyq keńester týraly» Zańdary Ult josparyna sáıkes ázirlendi. Bıyl Qazaqstannyń táýelsizdik alǵanyna 25 jyl tolǵaly otyrsa, aldaǵy maqsat - qaı salada bolsyn tabystardy baıandy etip, dúnıe júzindegi aldyńǵy qatarly otyz memlekettiń qataryna ený. Bul baǵytta elimizde kóptegen is-shara qolǵa alynyp jatqany málim. Atalmysh qos zańnyń qabyldanýy - sondaı sharanyń biri. Zań jobasyn daıyndaýǵa jumys tobymen birge barlyq qoǵamdyq uıym ókilderi qatysty. Jurtshylyqtyń usynys-pikirleri de jan-jaqty talqylanyp, eskerildi. Sonyń nátıjesinde qos zań Eýropa elderinde joǵary baǵalandy. Máselen, «Aqparatqa qol jetkizý týraly» Zańyn daıyndaǵany úshin QR Parlamenti Májilisiniń komıtet tóraǵasy Máýlen Áshimbaevtyń atyna Jenevadaǵy Elektrondyq aqparat quraldary uıymynyń bas hatshysynan alǵyshat keldi. Jalpy alǵanda, bul zańdar memleketimizde azamattyq qoǵamnyń damýyna tyń serpin beretini anyq.
Jıynda sondaı-aq BUU-nyń Qazaqstandaǵy damý baǵdarlamasynyń jobalar boıynsha menedjeri Gúlmıra Tólesbaeva, EQYU-nyń Astanadaǵy baǵdarlamalar keńsesiniń ókili Marııa Dýbovıtskaıa, QR Memlekettik qyzmet isteri jáne sybaılas jemqorlyqqa qarsy is-qımyl agenttigi BQO boıynsha departamentiniń basshysy, ádep keńesiniń tóraǵasy Bolat Ysqaqov jáne basqalar atalmysh zańdardyń azamattyq qoǵamdy alǵa aparýdaǵy mańyzy zor ekendigin, memlekettik qyzmetti damytýdyń jańa kezeńi bastalǵandyǵyn, ashyqtyq, esep berý jáne aqparat alýda qoljetimdilikti qamtamasyz etip, sybaılas jemqorlyqqa tosqaýyl qoıýǵa septigin tıgizetinin atap ótti.
Atalǵan zańdardyń mán-mańyzyn túsindirý baǵytynda trenıngter de ótkizildi.