Memlekettik basqarýdyń sapasy kóterilse, xalyqtyń jaǵdaıy jaqsarady - BUU Damý baǵdarlamasy
Búginde adamdar arasyndaǵy tepe-teńsizdik máselesi qandaı ózekti bolsa, jahandyq deńgeıde tutas memleketterdiń teńsizdigi de sondaı kókeıkesti másele bolyp tur. Bir jerdegi el qazirgi zamannyń barlyq ıgilikterin paıdalanady. Al kórshi otyrǵan eldiń xalqy sýǵa da zar bolyp jatady. Osylaısha, bir memlekette adamdardyń tepe-teńsizdigi bárin bir maqsatqa jumyldyrýǵa qalaı kedergi jasasa, dál osy problema jahandyq dárejede barlyq memleketterdiń, jalpy álemniń turaqty damýyna keri áserin tıgizedi. Sol sebepti BUU-nyń Damý baǵdarlamasy turaqty damýǵa jetýdiń naqty maqsat-mindetterin belgiledi. Al uıymǵa múshe memleketter ol mindetterdi oryndaýǵa kelisti. Turaqty damý maqsattarynyń biri - memlekettik basqarýdyń tıimdiligin arttyrý. Óıtkeni árbir memleket basqarý júıesin únemi jetildirip, naqty nátıjege qol jetkizip otyrsa, xalyqtyń ál-aýqaty ósedi, jaǵdaıy da jaqsarady. Álbette, atalǵan jumys birkelki, ıaǵnı barlyǵyna ortaq júrgizilse, barsha álem turaqty damý jolyna túse alady, san alýan túsinispeýshilikter bolmaıdy. Al memleketter arasyndaǵy túsinispeýshilikter bolmasa, aımaqtyq shıelenister de týyndamaıdy.
"Turaqty damý maqsattary jahandyq ósýdi kózdeıdi. Bul degenimiz, biz eshkimdi artta qaldyrmaýmyz qajetin bildiredi. Memleketter arasyndaǵy san alýan kedergilerge qaramastan, osy maqsattarǵa jetýimiz kerek. Ol úshin ozyq tájirıbe barlyǵyna ortaq bolýy tıis. Al uıymǵa múshe memleketter júzdegen kórsetkishterdi oryndaýy shart. Bunyń barlyǵy turaqty damý maqsattaryna saı keledi. Árbir memlekettiń úkimetteri soǵan qaraı yńǵaılanady, óz baǵdarlamalaryn da soǵan qaraı jasaqtaıdy. Al memlekettik basqarýdyń tıimdiligin baǵalaý arqyly biz naqty qandaı maqsattarǵa jetkenimizdi kóre alamyz. Ony árbir memlekettiń xalyq aldyndaǵy esebi dep túsinýge de bolady", - dedi BUU-nyń Damý baǵdarlamasynyń Eýropa men TMD boıynsha bas bıýrosynyń dırektory Djeıxan Sultanoǵly búgin Ystanbuldaǵy konferentsııanyń ashylýynda.
Bıýro basshysynyń aıtýynsha, búginde BUU Damý baǵdarlamasy memlekettik basqarý júıesin jetildirýdi kózdeıtin kez kelgen memleketke qoldaý jasaýǵa daıyn. Uıym bilim berý jaǵynan da, qarjylaı qoldaý jaǵynan da kómek bere alady. Basty talap - barlyq bastamalardyń turaqty damý maqsattaryna saı kelýi. "BUU-nyń basty ustanymy - eshkimdi artta qaldyrmaý. Onyń ishinde kedeıshilikti joıý, basqarýdyń tıimdiligin arttyrý jáne taǵy basqa mańyzdy maqsattar bar. Eń bastysy, biz jalpyǵa ortaq progresske jol ashýymyz qajet", - dep atap kórsetti Sultanoǵly xanym. Óz sózinde ol konferentsııany uıymdastyrýǵa atsalysqan Astana memlekettik qyzmet xabyna da alǵys bildirdi.
Búgingi májiliste memlekettik qyzmetter men bıýdjettik baǵdarlamalar tıimdiligin arttyrý, jalpy memlekettik saıasat salasynda baǵalaý júıesin qoldaný, sondaı-aq osy joldaǵy jeke menshik sektordyń róli keńinen talqylanady.
Aıta ketken jón, keshe osy konferentsııa aıasynda memlekettik organdardyń tıimdiligin baǵalaý salasyndaǵy Qazaqstannyń tájirıbesi keńinen tanystyryldy. Osyǵan oraı, arnaıy semınar uıymdastyryldy. Al Astana memlekettik qyzmet xabynyń tóraǵasy Álıxan Baımenov atalǵan sharanyń moderatory boldy. "Búgingi jahandyq zamanda memlekettik basqarýdyń sapasyna basa nazar aýdarǵan jón. Sóz joq, sapaǵa qol jetkizý úshin naqty nátıje bolýy shart. Osy oraıda memlekettik organdardyń tıimdiligin baǵalaýdyń ulttyq júıesi kóp nárseni aıqyndaıdy. Ondaı júıeniń arqasynda árbir eldiń naqty progresin, turaqty damý jolyndaǵy jetistikterin kórýge bolady. Al turaqty damýdyń nátıjesinde xalyqtyń ómiri jaqsarady", - dedi Baımenov.
Hab basshysynyń aıtýynsha, búginde árbir elde memlekettik organdardyń tıimdiligin baǵalaý júıesi ártúrli. Degenmen, barlyǵy bir nárseni kózdeıdi. Ol - naqty nátıjege qol jetkizý. "Sondyqtan osy ispetti sharalarda ózara tájirıbe almasyp, tıimdi ári yńǵaıly júıeni qalyptastyrýǵa múmkindik bar. Búgingi semınarda biz Qazaqstannyń tájirıbesin tanystyryp qana qoımaı, memlekettik baǵalaý júıesin jetildirý salasynda da tájirıbe almasamyz. Sebebi ol júıeni únemi kúsheıtip otyrý qajet. Jalpy, Astana óńirlik xaby osy saladaǵy sharalardy tolyǵymen qoldaımyz", - dep atap kórsetti Á.Baımenov.
Aldaǵy ýaqytta Astana memlekettik qyzmet xabynyń bastamasymen memorgandardyń tıimdiligin baǵalaýǵa arnalǵan aımaqtyq semınardy uıymdastyrý josparlanyp otyr. Budan bólek, osy saladaǵy tájirıbemen jan-jaqty almasý maqsatynda alıans qurylady. Oǵan Estonııa, Koreıa syndy "elektrondy úkimetti" damytýdyń úzikteri kiretin bolady.
Budan bólek, xab basshysy Álıxan Baımenov QR Respýblıkalyq bıýljettiń atqarylýyn baqylaý jónindegi Esep komıtetiniń quziretin keńeıtýdi usyndy.