Memlekettik basqarý akademııasy túlekteriniń mindetti jumys óteý tártibine ózgerister engizilmek

ASTANA. QazAqparat – QR Prezıdentiniń janyndaǵy Memlekettik basqarý akademııasy túlekteriniń mindetti jumys óteý tártibine ózgerister engiziledi. Bul týraly Senattyń jalpy otyrysynda QR Memlekettik qyzmet isteri agenttiginiń tóraǵasy Darhan Jazyqbaev aıtty, dep habarlaıdy QazAqparat tilshisi.

Tıisti norma búgin palata otyrysynda birinshi oqylymda talqylanǵan «Qazaqstan Respýblıkasynyń keıbir zańnamalyq aktilerine memlekettik qyzmet máseleleri boıynsha ózgerister men tolyqtyrýlar engizý týraly» zań jobasynda eskerilgen.

«Memlekettik basqarý akademııasy túlekteriniń mindetti jumys óteý tártibine ózgerister engizilip otyr. Qoldanystaǵy zańǵa sáıkes, Memlekettik basqarý akademııasyna oqýǵa túsken memlekettik organnyń qyzmetshisi oqýdan keıin mindetti túrde sol organda jumys óteýi tıis. ıAǵnı, bir jyl boıy qyzmetshi ózge memlekettik organǵa aýysa almaıdy. Bul óz kezeginde memlekettik qyzmetshiniń múmkindigin shektep, óziniń bilimin jetildirýge, oqýǵa túsýge degen yntasyn azaıtady. Osy oraıda atalǵan talapty alyp tastap, akademııa túleginiń jalpy memlekettik qyzmette úsh jyl jumys óteýi talabyn qaldyrý usynylyp otyr», - dedi D. Jazyqbaev.

Budan buryn habarlanǵandaı, agenttik basshysy basqa óńirge aýysqan memlekettik qyzmetshilerge rotatsııalyq tólem beriletinin, bul qarajat páter jaldaýǵa baǵyttalatynyn aıtty.

Sonymen qatar, memlekettik qyzmette qashyqtan jumys isteý jáne ıkemdi jumys kestesin retteý quzyretin agenttikke berý qarastyrylǵan.