Memlekettik baǵdarlama arqyly qoljetimdi baspanaǵa qalaı qol jetkizýge bolady

ASTANA. QazAqparat - Halyqty qoljetimdi turǵyn úımen qamtamasyz etý - memlekettiń basty mindeti. Osy rette elimizdiń Ulttyq ekonomıka mınıstrligi baspana máselesin sheshýge qandaı baǵdarlamalar men tetikter kómek bere alatynyn túsindirdi.

Sonymen, birinshisi - jergilikti atqarýshy organdarda kezekte turǵan azamattar úshin salynatyn jalǵa beriletin turǵyn úı. Turǵyn úıdi bólý jumysyn kezek tártibinde jergilikti atqarýshy organdardyń janyndaǵy turǵyn úı komıssııalary júzege asyrady. 2016 jyly 754 turǵyn úı salý josparlandy.

Ekinshisi - turǵyn úı qurylys jınaq júıesi arqyly iske asyrý úshin jergilikti atqarýshy organdardyń jáne «Báıterek development» AQ-tyń kredıttik turǵyn úıi. Kredıttik turǵyn úı QTQJB salymshylary men jergilikti atqarýshy organdarda kezekte turǵandardyń arasynda bólinedi. Respýblıkalyq bıýdjetten qarjylandyrý kezinde qurylystyń bir sharshy metriniń quny Astana jáne Almaty qalalarynda 142,5 myń teńgeni, qalǵan óńirlerde  110 myń teńgeni quraıdy. Jergilikti atqarýshy organdar oblıgatsııalar shyǵarý esebinen qarjylandyrý kezinde bir sharshy metrdiń qurylysynyń quny Astana jáne Almaty qalalarynda 180 myń teńgeni, óńirlerde - 140 myń teńgeni quraıdy.

Úshinshisi -  TÚQJ júıesi arqyly iske asyrý úshin «Báıterek development» AQ kredıttik turǵyn úıi. Kredıttik turǵyn úı QTÚQJB salymshylar arasynda bólinedi. «Báıterek development» AQ arqyly qurylystyń bir sharshy metriniń quny Astana jáne Almaty qalalarynda 200 myń teńgeni, óńirlerde - 180 myń teńgeni quraıdy.

Tórtinshisi -  QTÚQJB arqyly jas otbasylar úshin jalǵa beriletin turǵyn úı. Turǵyn úı QTQJB salymshylary sanynan, eki jyldan kem emes nekede turǵan jáne jubaılardyń ekeýiniń jasy 29-ǵa tolmaǵan jas otbasylarǵa bólinedi. Qurylys jergilikti atqarýshy organdarymen júrgiziledi. Osy baǵyt boıynsha aǵymdaǵy jyly shamamen 400 páter paıdalanýǵa beriledi. Bir sharshy metrdiń quny Astana jáne Almaty qalalarynda 142,5 myń teńgeni, basqa óńirlerde - 110 myń teńgeni quraıdy.

Besinshisi - «Qazaqstan Ipotekalyq kompanııasy» AQ-tyń jalǵa beriletin turǵyn úıi. Turǵyn úıdiń 50 paıyzy 35 jasqa tolmaǵan, jergilikti atqarýshy organdarda kezekte turǵandar úshin salynady, qalǵan 50 paıyzy basqa kezekte turǵan azamattar arasynda bólinedi. Bir sharshy metrdiń quny Astana jáne Almaty qalalarynda 200 myń teńgeni, óńirlerde 180 myń teńgeni quraıdy.

Altynshysy - «Jyljymaıtyn múlik qory» AQ-tyń kommertsııalyq turǵyn úıi. Turǵyn úı shekteýsiz halyqtyń kez kelgen sanatyna júzege asyrylady. 2016 jyly osy baǵyt boıynsha Ulttyq qordan 97 mlrd teńge bólindi. Shamamen 11 myń páter salý josparlanyp otyr. Bir sharshy metrdiń satý quny Astana men Almaty qalalarynda 288 myń teńgeni, óńirlerde - 240 myń teńgeni quraıtyn bolady.

Jetinshisi - «Jyljymaıtyn múlik qory» AQ arqyly jalǵa beriletin turǵyn úı. Turǵyn úı jergilikti atqarýshy organdarda kezekte turǵandarǵa keıin satyp alýmen jalǵa nemese tikeleı satyp alý jolymen usynylady.

Segizinshisi - «Báıterek Development» AQ arqyly jalǵa beriletin turǵyn úı. Turǵyn úı zańnamasymen aıqyndalǵan kezektilik tártibinde satyp alý nemese satyp alýsyz jalǵa beriletin turǵyn úı jergilikti atqarýshy organdardyń kezeginde turǵan azamattarǵa beriledi.