Memlekettik aýdıt ómirlik qıyn jaǵdaıdaǵy balalardy qoldaý ortalyǵynyń kemshilikterin anyqtady
2018 jylǵy 01 qańtary men 2020 jylǵy 31 jeltoqsan aralyǵyn qamtyǵan memlekettik aýdıt kezinde anyqtalǵan zańsyzdyqtardyń jalpy somasy - 10 mln 131 myń teńge.
«Sonymen qatar, ortalyqtyń jumysynda kadrlyq qamtamasyz etý lımıtteriniń bolmaýy, qyzdar men uldarǵa arnalǵan aksessýarlar men gıgıenalyq taýarlardyń mólsheri naqtylanbaýy, keńse kerek-jaraqtary jáne kámeletke tolmaǵan bir adamǵa mindetti orta bilim alý úshin qajetti basqa da quraldardy qarjylyq qamtamasyz etý normalarynyń bolmaýy, kámeletke tolmaǵandardyń ortalyqta qysqa merzimdi bolatynyn eskere otyryp, kúnine 1 balaǵa dári-dármekterdi bosatý boıynsha zańnamanyń jetildirilmeýimen baılanysty. Sondaı-aq, ártúrli sozylmaly, psıhologııalyq jáne basqa da aýrýlaryna baılanysty qıyn ómirlik jaǵdaıǵa tap bolǵan árbir kámeletke tolmaǵan adamǵa jeke kútim qajet bolsa da, báriniń bir ortalyqta bolýy da ortalyq jumysyndaǵy aqaýlarǵa jol ashqan bolýy múmkin», - dep jazylǵan Qarjy mınıstrliginiń ishki memlekettik aýdıt komıtetiniń habarlamasynda.
Komıtet mamandary ortalyqqa túsken balalardyń kıim-keshek normalaryn retteýi tıis normatıvtik-quqyqtyq aktiler arasynda qaıshylyqtar bar ekenin anyqtaǵan. Alynatyn zattardy nysanǵa keletin balalardyń sanaty men kútim merzimin eskere otyryp josparlaý tetigi de jolǵa qoıylmaǵan.
«Zańnamanyń jetildirilmeýi kámeletke tolmaǵandar arasyndaǵy quqyqtyq zańsyzdyqtardyń, qadaǵalaýsyz jáne panasyz qalýdyń aldyn alý memlekettik saıasat qaǵıdattarynyń buzylýyna ákep soqtyrǵan. Atap aıtqanda, ómirlik qıyn jaǵdaıdaǵy árbir kámeletke tolmaǵan adamǵa kórsetiletin jeke kútimniń ǵylymı negizdi bolý qaǵıdaty buzylǵan. Osylaısha, 2004 jylǵy 9 shildedegi N 591 «Kámeletke tolmaǵandar arasyndaǵy quqyq buzýshylyqtardyń aldyn alý jáne balalardyń qadaǵalaýsyz jáne panasyz qalýynyń aldyn alý týraly» Qazaqstan Respýblıkasy Zańynyń 3-baby buzylǵan», - deıdi Almaty qalasy boıynsha ishki memlekettik aýdıt departamentiniń basshysy Rahymjan Dildaev.