Memlekettik aýdıt 80 mlrd teńgege teń qarjylyq buzýshylyqtardy anyqtady

NUR-SULTAN. QazAqparat – Jyl basynan beri 5,3 trln teńgege 328,5 myń memlekettik satyp alý rásimi tekserildi. Bul týraly Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Bıylǵy 5 aıda 5,3 trln teńgeden astam somaǵa 328,5 myń memlekettik satyp alý rásimi kameraldyq baqylaýmen qamtyldy. Tekserý qorytyndylary boıynsha 26 145 rásimniń buzylǵany anyqtaldy, onyń ishinde memlekettik aýdıt obektileri buzýlardy joıý týraly habarlamalardyń 93%-yn oryndady», - dedi Qarjy mınıstri Úkimettiń búgingi otyrysynda.

Spıkerdiń aıtýynsha, 957 aýdıtorlyq is-shara ótkizildi. Shamamen 1,9 trln teńge bıýdjet qarajaty aýdıtpen qamtyldy.

«Osylaısha 80 mlrd teńgege qarjylyq buzýshylyqtar anyqtaldy. Taýarlardy jetkizý, qyzmetterdi kórsetý jáne jumystardy oryndaý, bıýdjetke óteý jáne esepke alý jolymen 71 mlrd teńgeniń buzýshylyqtary joıyldy. Aýdıt obektileri qyzmetin jetildirý jáne tıimdiligin arttyrý úshin 817 usynym berildi», - dedi Erulan Jamaýbaev.

Buǵan deıin Qarjy mınıstri memlekettik bıýdjetke 6 trln 554 mlrd teńge kiris túskenin, bıýdjet kiristeri jospardan 41 mlrd teńgege asyra oryndalǵanyn aıtqan edi.

Jyl basynan beri bıýdjettiń 65 mlrd teńgesi atqarylmaǵan, onyń ishinde 7 mlrd teńge únemdelse, 58 mlrd teńge ıgerilmeı qalǵan.