Memlekettik aýdıt 244 mlrd teńgeniń zań buzýshylyqtaryn anyqtady

NUR-SULTAN. QazAqparat – Jyl basynan beri 3,2 trln teńge bıýdjet qarajatyna aýdıt júrgizildi. Bul týraly QR Premer-Mınıstriniń orynbasary, Qarjy mınıstri Erulan Jamaýbaev aıtyp berdi, dep habarlaıdy QazAqparat tilshisi.

Bıylǵy 7 aıda 7,3 trln teńgege 342 myńnan astam memlekettik satyp alý rásimderi kameraldyq baqylaýmen qamtyldy. Tekserý qorytyndysy boıynsha 23 286 rásimde zań buzýshylyqtar anyqtaldy, onyń ishinde memlekettik aýdıt nysandary olardy joıý týraly habarlamalardyń 93% oryndady», - dedi Qarjy mınıstri Úkimettiń búgingi otyrysynda.

Onyń aıtýynsha, bıylǵy 7 aıda 1 485 aýdıtorlyq is-shara ótkizildi. Shamamen 3,2 trln teńge bıýdjet qarajaty aýdıtpen qamtylyp, 244 mlrd teńgege qarjylyq zań buzýshylyqtar anyqtalǵan.

«Taýar jetkizý, qyzmet kórsetý jáne jumystardy oryndaý, bıýdjetke óteý jáne esepke alý jolymen 234 mlrd teńgeniń zań buzýshylyqtary joıyldy. Aýdıt obektileri qyzmetin jetildirý jáne tıimdiligin arttyrý úshin 1 291 usynym berildi», - dedi E. Jamaýbaev.

Buǵan deıin Qarjy mınıstri memlekettik bıýdjetke 8 trln 463 mlrd teńge kiris túsip, jospardyń 105,1%-ke oryndalǵanyn aıtqan edi.

Sonymen birge, respýblıkalyq bıýdjettiń 31 mlrd teńgesi ıgerilmeı qalǵan.

Foto: moneysense.ca