Memlekettik aýdıt: 219 aýdıtorlyq is-shara ótkizildi

NUR-SULTAN. QazAqparat – 219 aýdıtorlyq is-sharalar ótkizildi. Bul týraly Úkimet otyrysynda QR Qarjy mınıstri Erulan Jamaýbaev bıylǵy qańtardaǵy memlekettik bıýdjettiń atqarylý kórsetkishterin baıandaý kezinde málim etti, dep habarlaıdy QazAqparat tilshisi.

Memlekettik aýdıtke toqtalǵan mınıstr, 2021 jylǵy qańtarda kameraldyq baqylaýmen somasy 1,1 trln teńgege 71,5 myńnan astam memlekettik satyp alý rásimderi qamtylǵanyn aıtty. Tekserý qorytyndylary boıynsha somasy 38 mlrd teńgege talaptardy buzýshylyqtar eskertildi.

«219 aýdıtorlyq is-shara ótkizildi. Aýdıtpen 120 mlrd teńge bıýdjet qarajaty qamtyldy. Somasy 17 mlrd teńgege qarjylyq buzýshylyqtar anyqtaldy. Taýarlardy jetkizýdi, qyzmetterdi kórsetýdi jáne jumystardy oryndaýdy qalpyna keltirý, bıýdjetke óteý jáne esepke alý boıynsha kórsetý jolymen 10 mlrd teńgege ereje buzýshylyqtar joıyldy», - dedi E. Jamaýbaev.

Onyń aıtýynsha, aýdıt nysandary qyzmetiniń tıimdiligin jetildirý jáne arttyrý úshin 198 usynym berilgen.