Memlekettigimizdi saqtaý úshin aýyzbirshiligimizdi saqtaıyq - Prezıdent

<p>El Prezıdenti Qasym-Jomart Toqaev jańajyldyq beınequttyqtaýynda elimizdegi tatýlyqty, tynyshtyq pen turaqtylyqty baǵalaý jóninde aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Biz árbir tańǵa úmit artamyz, árbir jyldan jaqsylyq kútemiz. Al úmittiń aqtalýy, arman-maqsattyń oryndalýy ózimizge baılanysty. Eń bastysy, elimizdegi tatýlyqty, tynyshtyq pen turaqtylyqty baǵalaıyq. Birligi myqty eldiń rýhy bıik bolady. Uly Abaı aıtqandaı, birlik degenimiz – eń aldymen, aqylǵa – birlik. Memlekettigimizdi saqtaý úshin aýyzbirshiligimizdi saqtaıyq. Qasterli Otanymyzdy kórkeıtemiz desek, tabandy eńbek eteıik», - dedi Prezıdent.

Óz quttyqtaýynda Memleket basshysy damyǵan memleket bolý úshin ozyq bilimge umtylyp, jańa tehnologııany, sonyń ishinde jasandy ıntellektini ıgerý qajettigin basa aıtty.

«Táýelsizdik urpaqtary jaqsy qasıetterdi boıyna sińirip ósip keledi. Olar ónerde, sportta, ǵylymda jáne bızneste zor tabysqa jetýde. Biz jastarymyzdyń osyndaı myqty, adal azamat bolǵanyn maqtan tutamyz. Qazaqstannyń bolashaǵy – otanshyl, bilimdi, eńbekqor azamattardyń, ıaǵnı jastardyń qolynda. Men jas urpaqtyń jasampazdyq qýatyna senemin!», - dedi Qasym-Jomart Toqaev.

Sondaı-aq, Prezıdent tek bolashaqqa, tek alǵa umtylatyn memleket bolý keregin, bir el bolyp biriksek, kez kelgen belesti baǵyndyratynymyzdy atap ótti.

«Eń bastysy, elimiz tynysh, irgemiz bútin bolsyn! Jańa jylǵa deıin sanaýly sekýndtar qaldy. Tabaldyryqtan attaǵaly turǵan jyl bárimiz úshin jetistikterge toly bolsyn!», - dedi Memleket basshysy.