Memleketter basshylary Joǵary EEK-tiń kezekti otyrysy qaıda ótetinin belgiledi
«Biz otyrys qarasha aıynyń sońynda - jeltoqsan aıynyń alǵashqy jartysynda Peterbýrgte ótetinin aıqyndap, kelistik», - dedi Reseı Prezıdenti Vladımır Pýtın Sochıde ótken kezekti otyrystyń sońynda.
Aıta ketsek, budan buryn Nursultan Nazarbaev Eýrazııalyq ekonomıkalyq odaqtyń jumysyna baǵa berip, bizdiń memleketterdiń ekonomıkalyq ósiminiń qarqyny ıntegratsııalyq protseske aıtarlyqtaı úles qosatynyn atap ótken bolatyn.
«Bizdiń uıymymyzdyń halyqaralyq bedeli de nyǵaıa tústi. Bizben saýda-ekonomıkalyq yntymaqtastyqta bolýǵa umtylatyn elderdiń qatary arta túsýde. Tolyqtaı alǵanda, qysqa ǵana ýaqyttyń ishinde EAEO aıaǵynan nyq turyp, tolyqqandy ıntegratsııalyq birlestik retinde qalyptasty dep aıtýǵa bolady. Búgingi otyrys bizdiń uıymymyzdyń odan ári ósýine jáne damýyna aıtarlyqtaı óz úlesin qosatyndyǵyna senimdimin», - dedi Qazaqstan Prezıdenti.
Sonymen birge, Nursultan Nazarbaev uıym aıasynda ekonomıkalyq yntymaqtastyqty ary qaraı bekemdeýge baǵyttalǵan birqatar máselelerdi kótergen edi. Qazaqstan Prezıdentiniń atap ótýinshe, eń birinshiden buǵan deıin qabyldanǵan sheshimderdiń oryndalýyn saralap, keshendi sharalar ázirleý úshin odaqqa múshe elderdiń arnaıy úkimetaralyq jumys tobyn qurý qajet. Jumys toby shekarada, sonymen qatar ekonomıkanyń salalary arasyndaǵy saýdaǵy kedergilerdi anyqtaý tıis.
Foto: kremlin.ru