Sport salasyna túbegeıli ózgeris qajet: Prezıdent qarajattyń qaıtarymy tómendigin aıtty
Qasym-Jomart Toqaev sport salasy árdaıym memlekettiń nazarynda bolatynyn aıtty. Jyl saıyn sportty damytý úshin qomaqty qarjy bólinedi. Alaıda, Prezıdenttiń pikirinshe, elimizdiń kásibı sporttaǵy kórsetkishteri asa joǵary deńgeıde emes.
– Ashyǵyn aıtýymyz kerek, nátıjemiz memleketten bólinip jatqan qarajattyń barynsha tıimdi jumsalmaıtynyn kórsetedi. Mundaı jaǵdaıǵa jol berýge bolmaıdy. Sport salasyna túbegeıli ózgerister, ıaǵnı reforma qajet. Tıisti mınıstrlik osy máseleni jan-jaqty qarap, sportty damytýdyń múlde jańa joldaryn usynýy kerek, - dedi Qasym-Jomart Toqaev.
Memleket basshysy jýyq arada sportty damytý úshin qabyldanýǵa tıis naqty sharalarǵa toqtaldy. Prezıdenttiń aıtýynsha, eń aldymen, kásibı sport túrlerine bólinetin qarajattyń qaıtarymyn túbegeıli arttyrýǵa kóńil bólgen jón. Óńirlerdiń erekshelikterine sáıkes naqty sport túrlerine basa nazar aýdaryp, qarjyny negizsiz jumsaý tájirıbesin toqtatý qajet. Sonymen qatar buqaralyq sport pen dene shynyqtyrýdy damytýǵa kóńil bóle otyryp, atalǵan salany qarjylandyrý modelin qaıta qaraǵan durys. Sondaı-aq Prezıdent sport salasyn basqarý sapasyn jaqsartýdy kelesi basymdyq retinde atap ótti.
– Týrızm jáne sport mınıstrligi, Ulttyq olımpıada komıteti (UOK) jáne federatsııalar arasynda úılesim joq. Sportty basqarý ınstıtýttarynyń qyzmeti men ózara yqpaldastyǵyna qatysty búkil júıeni qysqa merzimde qaıta qaraý qajet. UOK-niń qyzmetin jetildirý isine de nazar aýdarý kerek. Týrızm jáne sport mınıstrligi, UOK jáne federatsııalardyń jumysyn úılestirýdi túbegeıli jolǵa qoıý kerek. Tıimdi baılanystyń, yqpaldastyqtyń jáne ózara járdemdesýdiń bolmaýy jaqsy nátıjege jetkizbeıdi, ıaǵnı, jeńiliske ákep soqtyrady. Parıj Olımpıadasy qarsańynda mundaı keleńsizdikke jol berýge bolmaıdy. Memlekettiń bıýdjetinen qarjylandyrylatyn sport federatsııalarynyń qyzmetine revızııa jasaý qajet, - dedi Qasym-Jomart Toqaev.
Prezıdent ulttyq quramanyń daıyndyq deńgeıin arttyrý máselesin negizgi mindettiń biri retinde atady. Memleket basshysynyń pikirinshe, atletterimizdiń joǵary deńgeıde daıyndalýy úshin sport medıtsınasy men farmakologııa baǵytyndaǵy zamanaýı ınfraqurylymmen jabdyqtaý mańyzdy. Bul jerde Ulttyq sport ýnıversıteti negizgi ról atqarady. Sondyqtan onyń qurylysyn jyldamdatý kerek. Sport salasynda álemdik deńgeıdegi tóreshilerdi daıyndaýǵa kúsh salý qajet. Sondaı-aq jattyqtyrýshylar men basqa da sport mamandarynyń jalaqysyn kóterip, qosymsha áleýmettik qoldaý sharalaryn qabyldaǵan jón.
Sonymen qatar sportshylardyń rezervin daıarlaý máselesine arnaıy toqtalyp, Úkimet pen ákimder daryndy ári bolashaǵynan zor úmit kúttiretin atletterge qolaıly jaǵdaı jasaýǵa tıis ekenin aıtty.
– Elimizde úzdik nátıjege qol jetkizý úshin baryn salyp, eńbek etýge ázir qyz-jigitter jetkilikti. Legıonerlerge ıek arta bermeı, ózimizdiń sportshylarǵa jol ashýymyz kerek. Favorıtızm men ádiletsizdiktiń kez kelgen túrine tosqaýyl qoıyp, irikteýdiń ashyq jáne shynaıy ótkizilýin qamtamasyz etý asa mańyzdy. Halyqaralyq jarystarda el namysyn úzdikterdiń úzdigi ǵana qorǵaýy kerek. Otandyq sportta ádilettilik qaǵıdaty men básekeniń shynaıylyǵy birinshi orynda turýǵa tıis, - dedi Prezıdent.
Memleket basshysy sóziniń sońynda ótken jarystardaǵy olqylyqtardan naqty sabaq alyp, aldaǵy Parıj Olımpıadasyna tyńǵylyqty daıyndalýǵa shaqyrdy.