«Memleketquraýshy ulttyń tili ózge tilderden ústem turýy tıis» - respýblıkalyq basylymdarǵa sholý
***
«Memleket basshysy Nursultan Nazarbaev BUU Bas hatshysynyń orynbasary - BUU-nyń Jenevadaǵy bóliminiń Bas dırektory Qasym-Jomart Toqaevty qabyldady», - dep jazady «Egemen Qazaqstan» gazeti. Basylymnyń atap ótýinshe, Q.Toqaev Memleket basshysyn BUU-nyń aǵymdaǵy jáne perspektıvalyq qyzmeti týraly habardar etti. BUU Bas hatshysynyń orynbasary Prezıdenttiń BUU Bas Assambleıasynyń 66-sessııasynda sóılegen sózi halyqaralyq qoǵamdastyq tarapynan qyzyǵýshylyq pen jaqsy pikir týdyrǵanyn atap ótti. Sonymen qatar, Q.Toqaev BUU Bas hatshysy Pan Gı Mýnnyń izgi tilegi men sálemin jetkizdi.
Ústimizdegi jyldyń 27-30 qazany aralyǵynda Máskeý jáne Sankt-Peterbor qalalarynda RF Konstıtýtsııalyq Sotynyń 20 jyldyǵyn merekeleýge arnalǵan saltanatty is-sharalar ótýde. Atalǵan mereıtoılyq is-sharalarǵa Reseı Federatsııasy memlekettik bılik organdarynyń birinshi basshylary, bedeldi halyqaralyq uıymdar men quqyq qorǵaý ınstıtýttarynyń, sondaı-aq shetelderdiń konstıtýtsııalyq baqylaý organdarynyń ókilderi, solardyń qatarynda QR Konstıtýtsııalyq Keńesiniń Tóraǵasy I.Rogov bastaǵan delegatsııa da qatysýda. Osy sharalar arqaý bolǵan maqala «Egemen Qazaqstan» gazetiniń senbilik sanynda «20 jyldyń mereke saltanaty» degen taqyryppen jaryq kórdi. «Bul mereıtoıǵa Reseı taraby erekshe mán berýde. Іs-sharalardyń ashylý rásimi 27 qazan kúni Máskeý Kremlinde ótip, sol jerde sheteldik delegatsııalardy RF Prezıdenti D.A.Medvedev qabyldady», - dep jazady basylym.
***
«Aıqyn» gazetiniń senbilik sanynda QR Parlamenti Májilisiniń depýtaty Nurlan Ónerbaımen aradaǵy suhbat «Memleketquraýshy ulttyń tili ózge tilderden ústem turýy tıis» degen taqyryppen berilgen. Basylym tilshisiniń barlyq saýaldaryna tuşymdy jaýap bergen halyq qalaýlysy: «Sóıleımin degen kisi sóıleıdi. Aramyzda júrgen ózge ult ókilderiniń 70 paıyzy erteń tek qana memlekettik tilde sóıleımiz dese, sóılep ketedi. óıtkeni osynda týdy, ósti, tárbıelendi. Biraq biz ony talap etip otyrǵan joqpyz. Bul - bizdiń kinámiz», - deıdi.
5-14 qarasha aralyǵynda Frantsııanyń bas shahary - Parıj qalasynda aýyr atletıkadan álem chempıonaty ótedi. Osyǵan oraı «Aıqyn» gazetinde «Ziltemirshiler Parıjge sapar shegedi» degen taqyryppen maqala basyldy. «Eger bıylǵy jyly ótken jarystardyń nátıjesine kóz júgirtsek, Olımpıada baǵdarlamasyna engen sport túrinen elimizdiń ziltemirshileriniń eshqaısysy álem chempıonatynyń altyn tuǵyryna kóterile almaǵanyn ańǵaramyz. Iıa, kúmis pen qola medaldi ıelenip, qalyń jankúıerlerdiń ystyq yqylasyna bólengen jerlesterimiz boldy. Alaıda bas júldeniń jóni bólek», - dep jazady basylym.
***
«Kazahstanskaıa pravda» gazetiniń jazýynsha, keshe Memleket basshysy Nursultan Nazarbaev Qazaqstan Respýblıkasy Ulttyq Bankiniń tóraǵasy Grıgorıı Marchenkony qabyldady. G.Marchenko Memleket basshysyn eldiń qarjy salasyndaǵy, atap aıtqanda, valıýta naryǵynyń aǵymdaǵy jaǵdaıy týraly habardar etti. «Bankter tarapynan ekonomıkanyń naqty sektoryna nesıe bólý arta bastady. Turǵyndardyń depozıtteri men salymdarynyń ósimi turaqty jalǵasyn tabýda, osy rette depozıtti dollardan góri teńgemen salý jalǵasyn tabýda. Jalpy alǵanda, makroekonomıkalyq jaǵdaı, bank sektory men valıýta naryǵyndaǵy jaǵdaılar jaqsy qalypta qalyp otyr», - dedi G.Marchenko jýrnalısterge arnalǵan brıfıng barysynda.