Memleketke tıesili úsh úı men eki páterdi jymqyrdy dep kúdik keltirilgen adam Bishkekte qolǵa tústi

<p>ASTANA. KAZINFORM - Sybaılas jemqorlyqpen kúres qyzmetpi 2023 jyldan beri izdeýde júrgen &laquo;Ý&raquo; atty azamatty ustady, ol Almaty qalasy Polıtsııa departamentiniń ýaqytsha ustaý ızolıatoryna qamaýǵa alyndy.</p>

Oǵan buryn sot úkimimen tárkilengen úsh úı men eki páter túrindegi memlekettik múlikti jymqyrdy dep kúdik keltirilip otyr.

Alaıaqtyq Almaty qalasy boıynsha ákimdik pen Ulttyq qaýipsizdik komıteti departamentiniń laýazymdy adamdarynyń qatysýymen baqylaýdaǵy adamdarǵa jalǵan tómen baǵamen jáne belgilengen saýda-sattyqsyz jyljymaıtyn múlikti satý jolymen jasalǵan.

Bıylǵy 14 maýsymda Bishkek qalasynda «Ý» ustalǵannan keıin ol Qyrǵyz Respýblıkasy ІІM qyzmetkerlerine jeńildetilgen rásimder boıynsha óz erkimen Otanyna oralýǵa daıyndyǵy týraly habarlady.

Sol kúni Almaty qalasy prokýratýrasynyń úılestirýimen Sybaılas jemqorlyqpen kúres qyzmetkerleri «Ý»-dy Qyrǵyz Respýblıkasynyń shekarasynan ótkizip, Almatyǵa jetkizdi.

Qazirgi ýaqytta kúdiktiniń qatysýymen tergeý áreketteri júrgizilip jatyr.

Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.

«Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodekstiń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi»,-delingen habarlamada.