Memleketke qaıtarylǵan 5 mln gektar jer týraly málimetti ár qazaqstandyq kóre alady

ASTANA. QazAqparat – Bıyl memlekettik menshikke qaıtarylǵan 5 mln gektar jer týraly málimetterdi ınterakatıvti kartadan kórýge bolady, dep habarlaıdy QazAqparat tilshisi.

Búgin Májilistiń jalpy otyrysynda depýtat Berik Dúısenbınov Aýyl sharýashylyǵy mınıstri el óńirlerin aralaǵan kezde, birge baratynyn aıtty.

«Bıyl 5,2 mln gektar aýyl sharýashylyǵy jeri memlekettik menshikke qaıtarylǵany aıtyldy. Osy qaıtarylǵan jer telimderin bizge kórsetińiz. Bul turǵyda halyqtyń pikirin tyńdaımyz», - dedi B. Dúısenbınov.

Óz kezeginde QR Aýyl sharýashylyǵy mınıstri Erbol Qarashókeev el aýmaǵyndaǵy qaıtarylǵan jer telimderine qatysty ınteraktıvti karta iske qosylatynyn aıtty.

«Jaqyn arada ınteraktıvti kartany jasaımyz. Qaıtarylǵan 5,2 mln gektardyń ár telimin Qazaqstan halqy ashyq kóre alady. Keler jyly oblystardy sizben birge aralyp shyǵýǵa daıynmyn», - dedi mınıstr Májilis depýtatyna qarata aıtqan sózinde.

Budan buryn habarlanǵandaı, bıyl 5,2 mln gektar aýyl sharýashylyǵy jerleri memlekettik menshikke qaıtaryldy. Kelesi jyly qosymsha 5 mln gektardy qaıtarý josparlanyp otyr.