Memleketimizdiń bolashaǵy jolynda óte jaýapty ári batyl bastamalar jasaldy – Álı Bektaev
«QR Prezıdenti Qasym-Jomart Toqaevtyń halyqqa arnalǵan bıylǵy Joldaýy - elimizdi damytýdyń demokratııalyq negizderin ashyq aıqyndap bergen tarıhı oqıǵa. Qazirgi geosaıası jaǵynan kúrdeli zamanda memleketimizdiń búgini men bolashaǵy jolynda óte jaýapty jáne batyl bastamalar jasaldy. Búgingi Joldaý elimizdiń tarıhı qundylyqtary men qazirgi zamannyń kúrdeli dástúrlerin úndestire otyryp qabyldanǵan sheshimderge toly boldy. Joldaýda Parlamenttiń ókilettigin arttyrýǵa, majorıtarlyq saılaý júıesin birtindep engizýge, Prezıdentten bastap, oblys ákimderin, saıası qyzmetkerlerdi qosymsha saıası-qoǵamdyq, partııalyq basqarý mindetterinen bosatýǵa, el ekonomıkasyn damytýǵa qatysty mindetterdi sapaly atqarýǵa qatysty naqty tapsyrmalar berildi», - dedi senator.
Onyń atap ótýinshe, eń úlken máselelerdiń biri – jergilikti máslıhattar men ózin-ózi basqarý organdarynyń ókilettigin keńeıtý, aýmaqtyq máselelerdi sheshýge turǵyndardy belsendi jumyldyrý ekeni anyq. Saılaý júıesin túbegeıli ózgertý baǵytyndaǵy sharalar da aýqymdy bolmaq.
«Bútkil qazaqstandyqtar úshin Abaı, Ulytaý, Jetisý oblystarynyń jańadan ashylýy, Qapshaǵaı qalasyna bolashaqta D.Qonaev esiminiń berilýi óte qýanyshty, halyqtyń kópten kútken, eldiń eńsesin kóteretin, jańa belesterge bastaıtyn bastamalar ekeni shyndyq. Joǵaryda aıtylǵan jańalyqtar bıylǵy Joldaýdaǵy qadaý-qadaý bastamalardyń bir bóligi ǵana. Alda atqarylatyn sharýalardyń odan da kóp ekendigin Prezıdent ashyq aıtty. Kóptegen memleketterde jalpy ahýaldyń qıyndap jatqan kezeńinde bizdiń elde osyndaı naqty sheshimderdiń qabyldanýy el ekonomıkasy men áleýetiniń turaqtylyǵyn jáne áleýmettik turǵydan óte mańyzdy qadamdarǵa bara alatyndyǵymyzdy kórsetedi. Memleket basshysynyń óte batyl da salıqaly, barlyq jaǵynan oılastyrylǵan sheshimderi úshin óz rızashylyǵymyzdy bildiremiz», - dedi Álı Bektaev.
Senatordyń aıtýynsha, Prezıdenttiń barlyq bastamalary halyqtyń bolashaǵy úshin jasalyp otyr.
«Olaı bolsa, bárimiz de sol týdyń aınalasyna toptasyp, qańqý sózden aýlaq bolyp, birigip, birlesip, yntymaqtasyp qyzmet etýimiz kerek ekendigi anyq. Bul bárimiz úshin – úlken syn. Syn saǵattarda syndarly is-áreketter jasaý halqymyzǵa tán qasıet.Qazaqstan Parlamentiniń Senaty Memleket basshysynyń tyń bastamalaryn iske asyrýdy zańnamalyq turǵydan qamtamasyz etý úshin tıisti jumystar atqaratyn bolady», - dedi ol.