Memleket shekarasyndaǵy zańsyz saýda aınalymyna qarsy baǵdarlama ázirlenedi

NUR-SULTAN. QazAqparat – 2021 jyldyń 1 qyrkúıegine deıin memleket shekarasyndaǵy zańsyz saýda aınalymyna qarsy kedendik ákimshilendirýdi jaqsartýdy kózdeıtin Keshendi baǵdarlama ázirlenedi. Bul týraly Úkimet otyrysynda QR Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Offshorlyq ıýrısdıktsııalarǵa tranzaktsııalar boıynsha offshorlyq alymdy engizýdi qamtamasyz etý úshin ýákiletti organmen birlesip zańnamaǵa qajetti túzetýler pysyqtalýda. Osy jyldyń 1 qyrkúıegine deıin memleket shekarasyndaǵy zańsyz saýda aınalymyna qarsy kedendik ákimshilendirýdi jaqsartýdy kózdeıtin Keshendi baǵdarlama ázirlenetin bolady. Sonymen qatar, búgingi tańda 100 paıyz elektrondy kedendik deklaratsııalaý júzege asyryldy», - dedi mınıstr.

Sonymen qatar ol «Biryńǵaı tereze» jáne «ASTANA-1» aqparattyń júıesi engizilgenin, Táýekelderdi basqarý júıesin paıdalaný bastalǵanyn aıtty.

«Qytaı Halyq Respýblıkasymen taýarlardyń eksporttyq deklaratsııalarynyń málimetterin onlaın rejımde almasý júrgizilýde. Osyǵan uqsas jumystar basqa eldermen de júrgiziletin bolady. Arnaıy zaım sheńberinde 9 avto jáne 1 temir jol ótkizý pýnktin jańǵyrtý josparlanýda.

Eske salaıyq, 26 qańtar kúni ótken Úkimettiń keńeıtilgen otyrysynda Prezıdent Qasym-Jomart Toqaev shekaradaǵy kontrabandamen kúresetin arnaıy baǵdarlama ázirleýdi tapsyrdy.