Memleket retteıtin kásipter boıynsha jumyskerlerdi sertıfıkattaý mindetteledi
«Zań jobasy Memleket basshysynyń 2021 jylǵy 1 qyrkúıektegi Joldaýynda bergen tapsyrmasyn oryndaý baǵytynda ázirlendi. Bul qujat Ulttyq biliktilik júıesin qalyptastyrý jáne damytý kezindegi qoǵamdyq qatynastardy retteýge baǵyttalǵan. Ulttyq biliktilik júıesi Ekonomıkalyq yntymaqtastyq jáne damý uıymy elderiniń kópshiliginde memlekettik saıasattyń ajyramas bóligi bolyp sanalady. Bul júıeni olar eńbek ári jumyspen qamtý naryǵyn uzaq merzimdi damytý isinde qoldanady», - dedi QR Eńbek jáne halyqty áleýmettik qorǵaý mınıstri Tamara Dúısenova.
Osy oraıda ol zań jobasynda Ulttyq biliktilik júıesiniń mindetteri aıqyndalǵanyn atap ótti.
«Birinshiden, qoldanystaǵy jáne aldaǵy ýaqytta qajet bolatyn kásipter men kásiptik biliktilikterdi rettep, biryńǵaı júıege keltirý eskerilgen. Qazirgi kezde joǵary oqý ornyn bitirgender bakalavr, magıstr nemese doktor dárejesin alady. Soǵan sáıkes olar qyzmet pen jalaqy alýy tıis. Al is júzinde kóbine bilim dárejesi eskerilmeı, olar joǵary, birinshi ári ekinshi kategorııaly nemese kategorııasy joq mamandar retinde qabyldanyp, soǵan sáıkes eńbek qyzmeti belgilenedi. Sondyqtan qujatta qaralyp otyrǵan negizgi másele - júıede biryńǵaılyqty jáne birizdilikti qalyptastyrý. Ekinshi mindet - kásipter men kásiptilik biliktilikterdi retteý aıasynda eńbek naryǵynda suranysy bar kadrlardyń kásibı quzyrettiligin durys qalyptastyrý», - dedi mınıstr.
Zań jobasynda Ulttyq biliktilik júıesiniń tolyq arhıtektýrasy, ıaǵnı onyń negizin quraıtyn 6 bazalyq komponenti usynyldy. Birinshisinde ulttyq jáne salalyq biliktilik qamtylǵan. Onda aıaqtalmaǵan orta bilimnen bastap PhD dárejesine deıingi azamattarǵa qajet bolatyn 8 kásibı bilim deńgeıi aıqyndalǵan jáne osy deńgeıge týra keletin biliktiliktiń, mashyqtardyń talap-sıpattamasy kórsetilgen. Ekinshisi – qyzmetterdiń ulttyq klassıfıkatory. Bul - elimizdiń aýmaǵynda atqarylatyn qyzmetterdiń ataýyn, azamattardyń onda atqaratyn jumys túrin, mamandyǵyn jikteıtin qujat. Úshinshisi – qazirgi tańda eńbek naryǵynda bar jáne bolashaqta suranys bolatyn kásipterdiń tizimi. Tórtinshisi – kásibı standarttar nemese jumys berýshilerdiń kásibı biliktilikti aıqyndaıtyn talaptary. Besinshisi – bilim berý baǵdarlamalary. Altynshysy – kásibı biliktilikti rastaıtyn sertıfıkat.
«Kadrlarǵa talap jumys berýshiler tarapynan bolǵandyqtan, olardyń atqaratyn mindetterin de zań jobasynda tolyq qarastyrdyq. Birinshiden, jumys berýshiler qazirgi tańda jáne uzaq merzimdi bolashaqta suranysy bar kásipterdiń tizimin aıqyndaıdy. Ekinshiden, jumys berýshiler usynǵan kásipter tizbesi óńirlik jáne salalyq keńesterde odan ári tolyqtyrylyp, jınaqtalady. Sodan salalyq kásipter tizimi jasalady. Úshinshiden, salalyq kásipter tizimi óz kezeginde memleket retteıtin jáne ol rettemeıtin kásipter bolyp bólinetin bolady», - dedi Tamara Dúısenova.
Memleket retteıtin kásipter boıynsha jumyskerlerdi sertıfıkattaý mindetteledi. Bul sanatqa negizinen azamattardyń densaýlyǵy men qaýipsizdigin qamtamasyz etýge baılanysty mamandyqtar jatady. Memleket jaǵynan rettelmeıtin kásipter úshin sertıfıkattaý erikti bolady.
«Áriptestiktiń ekinshi jaǵy – kásiptik bilim berý júıesi. Bilim berý uıymdary jumys berýshilerdiń talaptaryn eskere otyryp, aldymen mamandyqtar men qyzmetterdiń klassıfıkatoryn jasaıdy. Odan keıin jumys berýshilerdiń kásiptik standarttary negizinde bilim berý baǵdarlamalaryn daıyndaıdy», - dedi vedomstıvo basshysy.
Jumys berýshiler men kásiptik bilim berý júıesi áriptestiginiń nátıjesin táýelsiz baǵalaý nemese sertıfıkattaý júıesin engizý arqyly anyqtalatyn bolady.
«Bul jumysty arnaıy sertıfıkattaý ortalyqtary júzege asyratyn bolady. Olar Ulttyq kásipkerler palatasynyń nemese basqa ýákiletti ınstıtýttardyń akkredıtatsııasynan ótken táýelsiz zańdy tulǵalar. Sertıfıkattaý ortalyqtaryn akkredıtatsııalaýdyń ózi «Akkredıtatsııalaý týraly» zańǵa jáne eńbek jónindegi ýákiletti organ bekitken erejelerge sáıkes qatań túrde júrgiziletin bolady», - dedi mınıstr.
Sertıfıkattaý protsesi tek azamattardyń biliktiligi kásiptik standarttarǵa qanshalyqty sáıkes keletinin anyqtaý ǵana emes, sonymen birge bilim berý uıymdarynda kadr daıarlaý deńgeıin baǵalaýǵa baǵyttalady. Táýelsiz baǵalaýdan ótken azamattarǵa sertıfıkattar beriledi.
«Bul rette dıplomdar men sertıfıkattar týraly arnaıy túsindire ketkim keledi. Táýelsiz baǵalaýmen qamtylǵan túlekterdiń qolynda naqty mamandyǵy boıynsha kásiptik daıarlyqtan ótkenin rastaıtyn dıplom jáne alǵan bilimderin is júzinde qoldanýǵa úırengenin rastaıtyn sertıfıkat bolady. Bir sózben aıtqanda, sertıfıkaty bar túlekterdi jumys berýshiler jumys ótilin talap etpeı-aq jumysqa alýǵa múmkindik ashylady. Sondaı-aq erikti sertıfıkattaýdan ártúrli úıirmeler, trenıngter nemese óz betinshe oqý arqyly jumysshy mamandyǵyn ıgergen adamdar da óte alady. Bul jaǵdaıda sertıfıkat jumysshy mamandyqtary boıynsha jumysqa qabyldaý kezinde negizgi qujat bola alady», - dedi Tamara Dúısenova.
Sertıfıkattaý aqyly negizde júzege asyrylady. Sertıfıkattaý ortalyqtary qyzmetteriniń aqysyn jumyssyz azamattar úshin ataýly vaýcherlerdi paıdalana otyryp memleket tóleıdi. Al, óz qyzmetkerlerin sertıfıkattaýǵa jibergen kezde, onyń aqysyn jumys berýshiler tóleıdi.