Memleket pen qoǵam qatynasynyń jańa modelin jasaý kerek - Erlan Saırov
«Qazirgi kezde barlyǵymyz kórip otyrmyz, árbir eldiń ishki saıasaty syrtqy geosaıası klımatqa baılanysty bolady. Qazirgi kezde geosaıası jaǵdaı dúnıejúzinde shıelenisip otyr. Sonymen birge, batystyń ámbebep dep eseptelgen modeliniń ózi korrozııaǵa ushyrap jatyr. Osy máseleler dúnıejúzinde qundylyqtar qaqtyǵysynyń bolyp jatqanyn kórsetedi. Negizinde, qazir Ýkraına men Reseıdiń arasyndaǵy soǵys – ol qundylyqtar soǵysy, ıaǵnı burynnan beri kele jatqan. Bul qundylyqtardyń qaqtyǵysy tek qana osy elderde ǵana emes, sonymen birge planetanyń túrli núktelerinde sezilip tur. Sonymen birge, batys modelindegi demokratııa elderi 10 jyldan beri saıası turǵydan da týrbýlenttilikke enip jatyr», - dedi E. Saırov.
Osy oraıda ol árbir el damýy úshin bılik pen qoǵamnyń, adam men memlekettiń arasyndaǵy qarym-qatynastardyń jańa modelderin jasaý kerektigin kórsetip otyrǵanyn aıtty.
«Mine, osyndaı modeldiń biri – qazaqtyń dástúrinde bar dala demokratııasy. Qazaq qoǵamy qurylǵannan bastap qazaq toptasqan kezde, qazaq aqyldasqan kezde - elimizdi eshkim basyp almaǵan. Sondyqtan Ulttyq quryltaıdyń eń negizgi máni – jahandyq túrdegi syrtqy qaqtyǵystardyń Qazaqstanǵa áserin azaıtyp, memleketti damytý úshin eldiń ishindegi ártúrli saıası spektorlar ókilderiniń basyn qosý. Bizdiń kózqarasymyz ártúrli bolýy múmkin, ómirdegi paıymymyz ózgeshe bolýy yqtımal, biraq bizdiń negizgi qundylyq – Qazaqstannyń Táýelsizdigi. Osy turǵyda barlyǵymyz birigýimiz kerek. Meniń oıymsha, quryltaıdyń eń negizgi maqsaty – Qazaqstannyń Táýelsizdigin ári qaraı damytý úshin mańyzdy qadamdar jasaý», - dedi depýtat.
Eske sala keteıik, bıyl naýryz aıyndaǵy Joldaýynda Memleket basshysy Qasym-Jomart Toqaev ulttyq quryltaı qurýdy usyndy.