Memleket kreatıvti jobalarǵa qandaı qoldaý kórsetedi

ALMATY. QazAqparat - Qazaqstanda kreatıvti ındýstrııany qoldaý korporatıvtik qory qurylady, onyń kómegimen jas talanttar qoldaý taýyp, shyǵarmashylyqty damytady. Bul týraly Mádenıet jáne sport mınıstri Dáýren Abaev Almatyda ótken kreatıvti qoǵammen kezdesý barysynda aıtty, onda tyń ıdeıalar men múmkindikter talqylandy, dep habarlaıdy QazAqparat.

Qor qysqa merzimdi bilim berý alańdaryn barynsha qoldaıdy, kreatıvti prodıýserler men art-menedjerler talanttardy tárbıeleı alatyndaı úı-jaı men jabdyqtarǵa qoldaý kórsetedi.

«Osy jyly kúzde kreatıvti ındýstrııalar boıynsha quzyret bizdiń mınıstrlikke bekitiledi. Sondyqtan sizderdiń ıdeıalaryńyzdy tyńdaý, jobalarmen tanysý jáne sizdermen birge salany damytýǵa kúsh salý biz úshin mańyzdy. Biz qazirgi kezde talanttar men kreatıvti ujymdardy qoldaý saıasatyn pysyqtap jatyrmyz», - dep atap ótti mınıstr Dáýren Abaev.

Kezdesýde qazaq tilindegi kontentti, fılm-ındýstrııany damytý, keskindeme, kreatıvti habtar negizinde shyǵarmashylyq ujymdardyń kollaboratsııasy arqyly elimizdiń ımıdjin ilgeriletý máseleleri talqylandy.

Kezdesýge qatysýshylar óner salasynyń túrli baǵyttarynyń ókilderi kúsh biriktirýi qajet dep sendirdi.

Aıta keteıik, kezdesýden soń mınıstr «Medeý» kreatıvti habynyń qurylysyna bardy.

Bul hab qalalyq kreatıvti orta men jastardyń sporttyq-týrıstik qoǵamdastyǵy arasyndaǵy baılanystyrýshy býynǵa aınalady.

«Medeý» haby kreatıvti ujymdarǵa tıimdi sharttarmen rezıdenttik alýǵa jáne serpindi ıdeıalardy júzege asyrýǵa múmkindik beredi.