Memleket kepildik bergen boryshtyń basqarylý tıimdiligine aýdıt júrgiziledi

ASTANA. QazAqparat – Memleket kepildik bergen boryshtyń basqarylý tıimdiligine aýdıt júrgiziledi. Bul týraly Májilistiń jalpy otyrysynda Joǵary aýdıtorlyq palatanyń tóraǵasy Natalıa Godýnova aıtty, dep habarlaıdy QazAqparat tilshisi.

«Bıýdjetti josparlaý kezinde boryshty basqarýǵa taldaý júrgizilmeıdi, olardy óteý kózderi eseptelmeıdi. Memlekettik borysh quramynda kvazımemlekettik sektor sýbektileriniń boryshy esepke alynbaıdy. Al bul – 19,7 trln teńge», - dedi Natalıa Godýnova.

Onyń atap ótýinshe, eger kvazımemlekettik sektor sýbektisi boryshyn tóleı almasa, olar memlekettik bıýdjetke salmaq bolyp túsedi.

«Óıtkeni, kóptegen qaryz memlekettik kepildiktermen tartylady. Biz bıyl memlekettik jáne memleket kepildik bergen boryshtyń basqarylý tıimdiligine memlekettik aýdıt júrgizýdi josparlap otyrmyz. Jobalardy jáne olardyń iske asyrylý tıimdiligi turǵysynan baıqaıtyn bolamyz. Ol jóninde Parlamentke kúzde esep beremiz», -dedi palata tóraǵasy.