Memleket kedeıshilikti eńserý úshin óte kóp is atqaryp jatyr - Darıǵa Nazarbaeva
«Qazaqstanda kedeıshilik sheginde ómir súretin adamdar kóp. Olar árbir qalada, aýdanda, aýylda bar. Olardy bilý, taǵdyrlaryna aralasyp, qındyqty eńserip, aıaǵynan nyq turýǵa kómektesý - siz ben bizdiń paryzymyz. Memleket kedeıshilikti eńserý úshin óte kóp is atqaryp jatyr. Degenmen, ol barlyq ýaqytta birdeı der ýaqytynda kelmeıdi nemese qajetti adamǵa jete bermeıdi. Menińshe, biz áleýmettik qyzmetterge belsendi kómek kórsetip, olardy medıtsınalyq, azyq-túlik, qarjylyq, zańdyq kómekke muqtajdar týraly aqparattandyra alar edik. Sonymen qatar biz ómirlik qıyn jaǵdaıǵa tap bolǵan adamdarǵa kómek kórsetý úshin qajetti resýrstar tabýǵa, mundaı máselelerge qoǵam nazaryn aýdarýǵa sep bola alar edik», - dedi ol «Jańa jaǵdaıdaǵy jastar: Іs-qımyl kezeńi» atty onlaın forým barysynda.
Sonymen qatar Darıǵa Nursultanqyzy bul jumystarǵa mektep oqýshylaryn, stýdentter men qarapaıym eriktilerdi tartýǵa da múmkindik bar ekendigin basa aıtty.
«Biz pandemııa tez arada aıaqtala qoıady dep oılamaımyz, onyń jaǵdaıynda áli uzaq ýaqyt áreket etýge daıyn bolýymyz kerek. Ol qoldaýdy qajet etetin adamdarǵa barynsha kómek kórsetýdi jalǵastyrý kerek degen sóz. Jastar úshin qoǵamǵa, ıaǵnı elimizge qaltqysyz qyzmet etýden mańyzdy is bolýy múmkin be? Osy qyzmet arqyly sizder tájirıbe jınaqtaısyzdar, qurmet pen bedelge ıe bolasyzdar jáne ómirde kóp jetistikterge jetesizder. Men sizderge shyn júrekten osyndaı ıgilikterdi tileımin. Osyndaı ómirlik ustanym jańa urpaqqa, jańa adamdarǵa kez kelgen daǵdarysty jeńýge jáne ulttyq egemendigimizdi nyǵaıtýǵa kúsh-qýat beredi dep senemin», - dedi Darıǵa Nazarbaeva.
Aıta keteıik, Aqparat jáne qoǵamdyq damý mınıstrligi Qazaqstan Jastar kongresimen seriktestikte respýblıkanyń barlyq aımaqtaryn onlaın formatta baılanystyra otyryp, «Jańa jaǵdaıdaǵy jastar: Іs-qımyl kezeńi» respýblıkalyq jastar bilim berý jobasyn iske qosty. Atalmysh shara bıylǵy jyly onlaın formatynda ótip jatqan «Zeren» bilim berý lageri aıasynda uıymdastyryldy.Eske sala ketsek, 2018 jyly Dúnıejúzilik jastar kúninde Zeren jastar bilim berý ortalyǵy quryldy. Bıylǵy jyly epıdemıologııalyq jaǵdaıǵa baılanysty bilim berý baǵdarlamalary onlaın-formatta ótkiziletin bolady. «Jastar men jańa syn-qaterler: áreket etetin ýaqyt» atty taqyryptyq ataýy bar onlaın-oqytý bes baǵyt boıynsha ótkiziledi: azamattyq belsendilik, eriktiler qyzmeti, aqparattyq tehnologııalar, jastar kásipkerligi jáne ózindik damý.