Memleket qarjysyna salynatyn nysandarǵa otandyq shynyny qoldanýdy talap etý qajet – Májilis depýtaty
«Prezıdentimiz Qasym-Jomart Kemeluly Toqaev Amerıka, Eýropa, Azııanyń damyǵan memleketterin aralap, dúnıejúzine tanymal kásiporyn basshylarymen kezdesip, olardy elimizge jumys isteýge shaqyryp, úlken qyzmet atqarýda. Osyndaı jumystyń nátıjesinde elimizde bolmaǵan ozyq jabdyqtarmen jabdyqtalǵan shyny óndirisi paıda boldy. Qańtar aıyndaǵy saılaýshylarmen kezdesý barysynda Qyzylorda oblysynda ornalasqan «Orda Glass Ltd» kásipornynyń jumysymen tanystym. «Orda Glass Ltd» kásiporny – elimizdegi jalǵyz shyny zaýyty. Jobaǵa ınvestorlardyń jeke qarajaty esebinen 46 mlrd teńge quıylǵan. 373 adamdy jumyspen qamtyp otyr. Zaýyt iske qosylǵannan beri 173 myń tonna ónim shyǵaryp, onyń 70 paıyzy ishki naryqqa satylsa, 30 paıyzy kórshi elderge eksporttalǵan», - dedi Úkimet basshysynyń atyna depýtattyq saýal joldaǵan Murat Ergeshbaev.
Degenmen, onyń atap ótýinshe, qazirgi tańda elimizge shetelden keletin shyny kóbeıdi. Sebebi ózge elderdiń úkimetteri otandyq taýar óndirýshilerge qoldaýdyń ár alýan mehanızmin jasap otyr. Mysaly, qosymsha qun salyǵyn qaıtaryp berý, gaz baǵasyn arnaıy tarıfpen tómendetý syndy sharalar qoldanady. Osyndaı memleketterdiń otandyq óndirýshini qorǵaý áreketteri arqasynda ımporttalatyn shyny baǵasy tómen.
«Joǵaryda atalǵandar negizinde jobanyń elimiz úshin mańyzdylyǵyn eskerý qajet. Otandyq taýar óndirýshilerge qoldaý jasap, tómen baǵamen kelip jatqan ónimderge zertteý júrgizý kerek. Memleket bıýdjetinen salynyp jatqan qurylys obektilerine otyndyq shynyny paıdalanýdy talap etý arqyly ózimizdiń otandyq óndirýshini qoldaýdy suraımyz», - dedi depýtat.