Memleket qaryzy qaýipsiz deńgeıde bolady – Álıhan Smaıylov

ASTANA. QazAqparat – Bıyl respýblıkalyq bıýdjettiń kirisi ósedi. Bul týraly Parlament palatalarynyń birlesken otyrysynda Úkimettiń jáne Joǵary aýdıtorlyq palatanyń 2022 jylǵy respýblıkalyq bıýdjettiń atqarylýy týraly esepterin qarastyrý kezinde Úkimet basshysy Álıhan Smaıylov aıtty, dep habarlaıdy QazAqparat tilshisi.

Birlesken otyrysta depýtattar memlekettik qaryzdy azaıtý úshin qandaı qadamdar jasalyp jatqanyn surady.

Premer-Mınıstr memlekettik boryshty azaıtý máselesi Úkimettiń turaqty nazarynda turǵanyn aıtty.

«Qaryz somasy qaýipsiz deńgeıde tur. Jalpy ishki ónimge shaqqanda 24,7 paıyzdy qurady. Memlekettik qaryzdy azaıtý jáne soǵan qatysty bıýdjet shyǵyndaryn tómendetý máselesin sheshý úshin Úkimet birqatar sharany qabyldady. Birinshiden, respýblıkalyq bıýdjettiń tapshylyqty kezeń-kezeń tómendetý eskerilgen. Bul óz kezeginde jańa qaryzdardy alýdy shekteıdi. Ekinshiden, bıýdjet kirisin ulǵaıtýǵa ekpin qoıylǵan. Bul turǵyda salyq ári keden salasyndaǵy ákimshilendirý ary qaraı jetildirilmek, ıaǵnı tsıfrlandyrý jalǵasady. Máselen, byltyrdyń qorytyndysy boıynsha respýblıkalyq bıýdjettiń kirisi 42 paıyzǵa ósti. Al bıyl da ósim 40 paıyz shamasynda bolady dep josparlanǵan», - dedi Á. Smaıylov depýtattardyń suraǵyna jaýap bere otyryp.

Onyń aıtýynsha, qaryzdy ishki naryqtan teńge valıýtasynda alýǵa ekpin qoıylyp otyr. Bul óz kezeginde valıýta salasyndaǵy táýekelderdi azaıtýǵa múmkindik beredi.

«Jalpy, keler 5 jylda memlekettiń qaryzy qaýipsiz deńgeıde bolady. Jalpy ishki ónimge shaqqanda 25 paıyzdan sheginen aspaıdy dep esepteımiz», - dedi Úkimet basshysy.

Budan buryn habarlanǵandaı, Premer-Mınıstrdiń orynbasary – Qarjy mınıstri Erulan Jamaýbaev memlekettik qaryz jalpy ishki ónimge shaqqanda 25 paıyzdan tómen deńgeıde turǵanyn aıtty.