Memleket Iraktan qaıtarylǵan jazyqsyz balalardy qalypty ómirge qaıtarý úshin aıanbaıdy – Abaev
«Áriptesterim (QR SІM-degi) bul máseleni jan-jaqty túsindirdi. Árıne, Iraktan qaıtarylǵan balalar beıimdeıtin, arnaıy kúzetiletin oryndarda qamqorlyqta bolady. Olarmen psıhologtar men pedagogtar, medıtsınalyq qyzmetkerler jumys júrgizedi. Osydan keıin balalardyń barlyǵy týǵan-týystaryna tapsyrylady. Ol jerde de balalar ýákiletti organdardyń nazarynda bolary anyq», - dedi ol.
Dáýren Abaev bul másele memleket basshylyǵynyń tikeleı baqylaýynda turǵanyn jetkizdi.
«Memleket bul jazyqsyz balalardyń qalypty ómirge qaıtyp, qoǵamnyń laıyqty múshesine aınalýy úshin qajetti barlyq jumysty atqarady. Bul rette Ulttyq qaýipsizdik komıtetiniń, Syrtqy ister mınıstrligi men Ádilet mınıstrliginiń, halyqaralyq uıymdardyń qyzmetkerlerine erekshe alǵys bildirý kerek. Olar óte úlken isti atqardy. Halyqaralyq sarapshylarmen ártúrli alańdarda kezdesken kezde olardyń bári de osy arnaıy operatsııa kezindegi tájirıbemizdi suraıdy», - dedi ol.
Eske sala ketsek, QR Prezıdenti Qasym-Jomart Toqaevtyń tapsyrmasy boıynsha júzege asyrylǵan gýmanıtarlyq aktsııa nátıjesinde Irak túrmesinde óz analarynyń janynda jatqan 14 qazaqstandyq bala eline qaıtarylǵan bolatyn.