Memleket fermerlerden bıdaıdy qaı baǵamen satyp alady

<p>Aýyl sharýashylyǵy mınıstrligi fermerlerden bıdaı satyp alýǵa qatysty jasalǵan sheshimge túsinik berdi, dep habaralaıdy <a href="https://www.inform.kz/" target="_blank" rel="noopener">Kazinform</a>.&nbsp;</p>

«Memleket basshysynyń zardap shekken sharýashylyqtarǵa qarjylaı jáne ózge de kómek kórsetý jónindegi tapsyrmasyn oryndaý maqsatynda Premer-Mınıstrdiń tóraǵalyǵymen byltyrǵy 9 qazanda Ekonomıkany jańǵyrtý jónindegi memlekettik komıssııanyń otyrysy ótti. Onda Azyq-túlik kelisimshart korporatsııasyna qatysty sheshimder qabyldandy. Atap aıtqanda, naryq deńgeıinde fermerler úshin satyp alý baǵasy belgilendi. Bul rette, forvardtyq satyp alý boıynsha 3-synypty bıdaıdyń baǵasy 120 myń teńgeni, 4-synypty bıdaıdyń baǵasy 105 myń teńgeni qurady», - delingen mınıstrliktiń Kazinform agenttigine bergen jaýabynda.

Sonymen qatar, forvardtyq satyp alý jáne taýar kredıti boıynsha mindettemelerdi oryndaý úshin 1 jyldyq keıinge qaldyrý qarastyrylǵan.

«Azyq-túlik kelisimshart korporatsııasynyń rezervteri negizinde tuqym qoryn qalyptastyrý da jalǵasady. Byltyrǵy 5 jeltoqsanynda 2023 jyldyń ónimi boıynsha 350 myń tonna kóleminde 4,5-sanattaǵy jáne surypty emes bıdaıdy tikeleı satyp alý jarııalanyp, tıisti satyp alý baǵasy belgilendi. Osy maqsattarǵa Úkimet qaýlysymen korporatsııanyń jarǵylyq kapıtalyn tolyqtyrýǵa 31,3 mlrd teńge bólindi. Qabyldanǵan sharalar men qosymsha bólingen qarajat sharýalardy 2024 jylǵy egis naýqanyna qajet qarjy resýrstarymen qamtamasyz etýge múmkindik beredi», - dep atalyp ótken habarlamada.

Munymen qosa, Azyq-túlik kelisimshart korporatsııasy qazirgi kezde sapasy tómen astyq pen 5-synypty bıdaıdy satyp alýshylardy belsendi túrde izdestirip jatyr.

Bul rette Qazaqstan astyǵyn satyp alatyn eldermen, ıaǵnı Iran, Qytaı, Ózbekstan, Ázerbaıjan jáne basqa da eldermen, sondaı-aq Qazaqstan naryǵyndaǵy satyp alýshylarmen (qus ári mal ósirýshiler, spırt zaýyttary) kelissóz jalǵasyp jatyr.

Eske salsaq, byltyr kúzde Aýyl sharýashylyǵy mınıstrligi 2023 jyly shyqqan astyq ónimi Qazaqstandy nan, un jáne makaron ónimderimen tolyq qamtamasyz etýge jetkilikti ekenin jarııalady.

2023 jyldyń aıaǵynda Parlament depýtattary Qazaqstanda fermerler sapasy tómen astyqtan shyǵynǵa batýy múmkin ekenin aıtqan edi.