Memleket basshysynyń Joldaýy qazirgi syn-qaterlerge naqty jaýap berip otyr – Baýyrjan Baıbek
«Osy oraıda, 3 negizgi máselege nazar aýdarǵym keledi, dep jazdy Baýyrjan Baıbek Facebook -tegi paraqshasynda.
«Birinshiden, Memleket basshysynyń el Táýelsizdiginiń 30 jyldyǵy tusynda jasaǵan bul Joldaýy basymdyqtardy aıqyndap, memleket pen qoǵamnyń ári qaraı damý baǵytyn belgilep qana qoımaı, sonymen birge osy jyldar aralyǵynda júrip ótken jolymyzdy da qorytyndylaıdy. Qasym-Jomart Kemeluly Joldaýynyń basynda aıtqandaı, «Qazaqstan Tuńǵysh Prezıdentimiz – Elbasynyń dara saıasatynyń arqasynda tabysty el retinde búkil álemge tanymal boldy. Eń basty jetistigimiz – birtutas el bolyp, jańa memleket qurdyq. Іrgemizdi bekitip, eńsemizdi tiktedik. Halyqaralyq qaýymdastyqtyń beldi múshesine aınaldyq. Turaqty qoǵam qalyptastyryp, ornyqty damý jolyna tústik».
Qazaqstan – búginde irgesi berik, tuǵyry myǵym memleket. Muny ishki saıası turaqtylyǵy, beıbit syrtqy saıasaty jáne jalpy ornyqty ekonomıkasy qamtamasyz etip otyr. Kezinde oppozıtsııanyń «qarajatty taratyp berý kerek» degenine qaramastan Elbasy Nursultan Nazarbaev qurǵan Ulttyq Qor búginde bizdiń ekonomıkalyq silkinisterdi eńserip qana qoımaı, eldiń ári qaraı damýy boıynsha jańa bastamalar usynýymyzǵa da múmkindik berýde.
Ekinshiden, Joldaý búkil álemdi jaılap, elimizdi ábigerge salǵan koronadaǵdarys ýaqytynda, azamattardyń áleýmettik-ekonomıkalyq ahýaly nasharlaǵan jáne narazylyq kóńil-kúı artqan kúrdeli jaǵdaıda jasalyp otyr. Osyndaı kezeńde biz, ókinishke qaraı, geosaıası týrbýlenttiliktiń, álemdik derjavalardyń sanktsııalyq teketiresteriniń kúsheıe túskenin baıqap otyrmyz. Aýǵanstannan myńdaǵan bosqyndar óz úılerin tastap ketip jatqanyn kórip otyrmyz, bul, árıne, Orta Azııa óńirindegi jáne jalpy bizdiń elimizdegi ahýalǵa da áser etpeı qoımaıdy.
Mundaı kúrdeli jaǵdaıda Memleket basshysynyń Joldaýy basymdyqtardy aıqyn belgilep, qazirgi syn-qaterlerge naqty jaýap berip otyr.
El Prezıdenti Qazaqstan úshin ulttyq birlikti odan ári nyǵaıtý, azamattyq qoǵamdy damytý men ekonomıkanyń sapaly ósýi úshin jańa yntalandyrý tetikterin qurýdyń basty basymdyqtary bolyp tabylatynyn atap kórsetti.
Bul qazirgi qıyndyqtardy tabysty eńserýge múmkindik berip qana qoımaı, pandemııadan keıingi kezeńde el damýyn qamtamasyz etýge de jaǵdaı týdyrdy.
Úshinshiden, Memleket basshysynyń saıası jańǵyrtýǵa, azamattyq qoǵamdy damytýǵa, jańa áleýmettik standarttardy endirýge, otandyq bıznesti qoldaýǵa, sybaılas jemqorlyqqa qarsy is-qımylǵa, sondaı-aq memlekettik apparattyń tıimdiligin arttyrýǵa baǵyttalǵan baǵdarynyń júıeli ári tabandy iske asyrylyp jatqanyn atap ótken jón. Jyl saıynǵy joldaýlar men el Prezıdenti Q.K. Toqaevtyń «Nur Otan» partıasynyń HH Sezinde jarııa etken «Ózgerister joly: Ár azamatqa laıyqty ómir!» Saılaýaldy baǵdarlamasynyń iske asyrylý barysy densaýlyq saqtaý júıesiniń sapasy, bilimniń qoljetimdiligi, tsıfrlandyrý, óńirlerdi damytý sekildi mańyzdy máselelerdiń qashanda basty nazarda ekenin kórsetedi. Qarapaıym qazaqstandyqtarǵa ataýly, naqty qoldaý kórsetýge, olardyń ál-aýqatyn arttyrýǵa erekshe kóńil , - dep atap ótti ol.
Baıbektiń aıtýynsha, partııanyń qoǵamdyq qabyldaý bólmelerine azamattardan kelip túsken 100 myńnan astam ótinishke jasalǵan taldaý, sondaı-aq «Nur Otan» depýtattarynyń halyqpen kóptegen kezdesýleriniń qorytyndysy búginde eń ózekti 3 máselege baǵalardyń ósýi, kommýnaldyq tarıfterdiń kóterilýi jáne baspanamen qamtamasyz etý jatatynyn kórsetip otyr.
Osyǵan baılanysty Memleket basshysynyń pandemııa jaǵdaıynda halyq tabysyn arttyrýǵa jáne tutynýshylyq suranysty yntalandyrýǵa baǵyttalǵan 5 bastamasynyń der ýaqytta usynylyp otyrǵanyn atap ótken jón.
Eń tómengi jalaqy mólsherin 60 myń teńgege deıin ulǵaıtý, bıznesti qyzmetkerleriniń jalaqylaryn kóterýge yntalandyrý sharalaryn iske asyrý, shaǵyn jáne orta bıznes úshin salyqtyq aýyrtpalyqty 34-ten 25%-ke deıin tómendete otyryp, eńbekaqy qorynan biryńǵaı tólem endirý, azamattyq qyzmetkerler sanatyndaǵylardyń basym bóliginiń jalaqylaryn jyl saıyn 20%-ke kóterý, sondaı-aq turǵyn úı nesıelerin alý sharttaryn ári qaraı ońtaılandyrý elimizdiń búkil derlik azamattaryn qamtıtyn sharalar bolmaq. Sarapshylardyń baǵalaýy boıynsha, eń tómengi jalaqy mólsheriniń ulǵaıýynyń ózi ǵana ekonomıkanyń 1,5%-ke ósýine ákeledi.
«Nur Otan» bıleýshi partııa retinde Joldaý men «Ózgerister joly: Ár azamatqa laıyqty ómir!» atty Saılaýaldy baǵdarlamanyń iske asyrylýyna júıeli qoǵamdyq baqylaýdy qamtamasyz etetin bolady.
«Jyl basynan beri respýblıkalyq deńgeıde saılaýaldy ýádelerdiń 11%-ti jáne óńirlik deńgeıde 12%-ti oryndaldy. Naqty tsıfrlarmen kórsetsek, bul – 7,7 mln. sharshy metr turǵyn úı, 12,2 myń orynǵa arnalǵan 34 mektep pen 4,5 orynǵa arnalǵan 68 balabaqsha, 160 myńnan astam jumys orny bar 77 jańa kásiporyn. Jyl sońyna deıin taǵy da 200 ártúrli áleýmettik nysan, onyń ishinde jańa mektepter, aýrýhanalar jáne t.b. paıdalanýǵa beriledi. Kólik jáne ınjenerlik ınfraqurylymdy aýqymdy túrde damytý jeke blok boıynsha iske asyrylýda.
Dostar! Memleket basshysy atap ótkendeı, «Biz tuǵyry myǵym el bolý jolynda kedergilerdi eńserip, qıyndyqtardy jeńip kelemiz. Munyń bárine berekeli birlik pen eseli eńbek arqyly jettik. Elimiz Táýelsizdik jylnamasynyń tórtinshi onjyldyǵyna qadam basqaly tur. Bul kezeńniń ońaı bolmaıtyny qazirdiń ózinde aıqyn baıqalýda. Sondyqtan, kez-kelgen syn-qaterge daıyn bolýǵa tıispiz. Tynymsyz izdenip, udaıy alǵa umtylýymyz qajet».
«Nur Otan» adamdar ıgiligi jolynda jumys istep jatqan maqsaty aıqyn, naqty ister partııasy retinde el Basshylyǵy qoıǵan mindetter men qazaqstandyqtar aldyndaǵy óz saılaýaldy ýádeleriniń barlyǵynyń iske asyrylýyn qamtamasyz etedi.
Biz birgemiz! Qıyndyqty eńserip, jeńiske birge jetemiz», -dep túıindedi «Nur Otan» partııasy Tóraǵasynyń Birinshi orynbasary óz jazbasynda.