Memleket basshysynyń tóraǵalyǵymen «Nur Otan» partııasy Saıası keńesiniń keńeıtilgen otyrysy bastaldy
Otyrys barysynda «Nur Otan» partııasynyń «Qazaqstan. 2017 maqsattary. Ulttyq is-qımyl jospary» Saılaýaldy tuǵyrnamasy mindetteriniń oryndalýy máselesi, sondaı-aq Sybaılas jemqorlyqqa qarsy is-qımyldyń 2015-2025 jyldarǵa arnalǵan baǵdarlamasynyń jobasy qarastyrylady.
Atap aıtqanda, partııanyń Saılaýaldy tuǵyrnamasyn júzege asyrýdyń 2,5 jylyndaǵy kezeńdik nátıjeleri aıtyldy. Saılaýaldy tuǵyrnamanyń naqty iske asyrylýy barysynda Májilistiń ótken sessııasynda 13 zań qabyldanyp, 11-ne bastamashylyq jasaldy. Barlyǵy 108 zań jobasy maquldandy, 102-si zań kúshine ıe boldy. Buǵan qosa depýtattar mynandaı naqty baǵyttar boıynsha ózara is-qımyldy kúsheıtti: partııalyq kýratorlardyń 15 sarapshylyq toby, elimizdiń barlyq óńirin qamtyǵan óńirlik kýratorlardyń 190 sarapshylyq toby Úkimetpen birlese jumys isteýde.
2014 jyldyń 8 shildesinde partııa Sybaılas jemqorlyqqa qarsy is-qımyldyń 2015-2025 jyldarǵa arnalǵan baǵdarlamasynyń jobasyn jarııalady. Aǵymdaǵy jyldyń 10 qarashasyndaǵy jaǵdaı boıynsha Baǵdarlama jobasyna qatysty partııa múshelerinen, sarapshylyq qaýymdastyǵynan jáne ınternet qoldanýshylardan 900-den astam usynys pen tolyqtyrý kelip túsip, osynyń arqasynda Baǵdarlama jobasynyń mátini 40 paıyzǵa ózgertildi.
Búgingi otyrysqa Saıası keńes músheleri - Úkimettiń, Parlamenttiń, Prezıdent Ákimshiliginiń basshylyǵy, «Nur Otannyń» Májilistegi Fraktsııasynyń depýtattary, Joǵarǵy Sottyń, Ulttyq Banktiń, Esep komıtetiniń tóraǵalary, Bas prokýror, mınıstrler, oblystyq fılıaldardyń basshylary - oblys ákimderi, sonymen qatar partııanyń oblystyq máslıhattardaǵy fraktsııalarynyń depýtattary qatysýda.