Memleket basshysynyń Almatyǵa jumys sapary qalaı ótti - sholý
Memleket basshysy sapar aıasynda qaladaǵy gıdrotehnıkalyq ınfraqurylymmen tanysyp, birqatar áleýmettik nysandy aralap kórdi. Sonymen qatar Prezıdent Almaty qalasynyń áleýmettik-ekonomıkalyq damý máseleleri jóninde keńes ótkizdi. Jıynǵa Úkimet músheleri de qatysty, dep habarlaıdy QazAqparat tilshisi.
Prezıdent Qasym-Jomart Toqaevtyń Almaty qalasyna jumys sapary bıyl 1 maýsymda paıdalanýǵa berilgen sel tasqynynan qorǵaıtyn bógetten bastaldy.
«Aıýsaı» bógeti Úlken Almaty ózeniniń basseıninde ornalasqan. Onyń joǵary jaǵynda sel qaýpi bar 98 ýchaske, 89 muzdyq, 20 morenalyq jáne muzdy kól bar. Bóget sel júrý qaýpin barynsha azaıtyp, 500 myńnan astam halyq pen 2 myńǵa jýyq nysannyń tabıǵat apatynan qorǵalýyn qamtamasyz etedi. Elimizdiń bıik taýly aımaqtarynda 970 morenalyq kól bar. Onyń ishinde 156 kólde sel júrý qaýpi joǵary.
Tótenshe jaǵdaılar mınıstri Syrym Sháriphanov bıyl sel júrýi yqtımal 13 kólde apattyń aldyn alý jumystary júrgizilgenin baıandady.
Sonymen qatar «Qazseldenqorǵaý» mekemesiniń basshysy Qaırat Bekenov Memleket basshysyna tabıǵat apattarynyń aldyn alý jumystary jóninde málimet berdi.
Onyń aıtýynsha, arnalardaǵy sýdy turaqtandyratyn jańa qorǵanys nysandaryn salý qajet. Olar Úlken Almaty, Esik, Talǵar, Qaskeleń jáne Túrgen ózenderiniń basseınindegi sý aǵysynyń jyldamdyǵyn azaıtyp, aǵyn sýdyń arnadan asyp ketpeýine septigin tıgizedi.
Qasym-Jomart Toqaevqa pılottyq joba aıasynda ornatylǵan 31 tsıfrlyq gıdrobeket tanystyryldy. Bul qondyrǵylar sýdyń jyldamdyǵyna, temperatýrasyna, laılylyǵyna jáne basqa da kórsetkishterge onlaın-rejımde monıtorıng júrgizedi. Mundaı tehnologııalar keleshekte elimizdiń jeti taýly aımaǵynda qoldanysqa engiziledi. Gıdrobeketterdegi málimet TJM Daǵdarys jaǵdaıyn basqarý ortalyǵynyń biryńǵaı aqparattyq júıesimen ıntegratsııalanatyn barlyq ǵylymı uıym men salalyq vedomstvolarǵa qoljetimdi bolady.
Memleket basshysy qala turǵyndarynyń qaýipsizdigin qamtamasyz etý úshin selden qorǵaý sharalaryn júrgizý mańyzdy ekenin atap ótti. Bul rette Prezıdent Tótenshe jaǵdaılar mınıstrligi, Almaty qalasy ákimdigi jáne «Qazseldenqorǵaý» mekemesi ózara tyǵyz qarym-qatynasta jumys isteýi qajet ekenin aıtty.
QR Prezıdenti 5,2 mlrd teńgege salynǵan mektepte boldy.
Qasym-Jomart Toqaev Almaty qalasyna jasaǵan jumys sapary aıasynda Prometheus school bilim berý uıymyn aralap kórdi.
Prezıdentke bilim ordasynyń oqý kabınetteri, jaratylystaný zerthanalary, mektepte sabaq oqytýdyń Daryn Go, Booky-Wooky avtorlyq ádistemeleri, sondaı-aq oqý ornynyń jalpy ınfraqurylymy tanystyryldy.
Rrometheus school byltyr 9 qarashada ashylǵan. Mektep 840 oqýshyǵa arnalǵan. Aýmaǵy – 12 myń sharshy metr. Bilim berý mekemesin salý úshin 5,2 mıllıard teńge ınvestıtsııa tartylǵan.
Az qamtylǵan otbasylardyń daryndy balalary úshin bilim granttary bólinedi. Mektep jyl saıyn grant sanyn arttyrýdy josparlap otyr.
Memleket basshysyna Enlightenment Power Group qory júzege asyryp jatqan jobalar týraly málimet berildi. Qor dırektory ári mekteptiń baqylaýshylar keńesiniń tóraǵasy Dosym Besbaıdyń aıtýynsha, 1400 oqýshyǵa arnalǵan «FızTeh» mektebin ashý jumystary júrgizilip jatyr. Bul mektep túlekterdiń álemdegi jetekshi tehnıkalyq joǵary oqý oryndaryna túsýine múmkindik týǵyzý úshin sapaly bilim berýdi kózdeıdi. Mektep qurylysyn bıyl qarasha aıynda aıaqtaý josparlanǵan. Jobaǵa tartylǵan ınvestıtsııa kólemi – 3,9 mıllıard teńge.
Memleket basshysy Prometheus School mektebindegi bilim berý jáne oqýshylardy daıarlaý formatynyń ereksheligin atap ótti. Sondaı-aq ustazdarǵa tabys tilep, olardyń qyzmeti qoǵam úshin mańyzdy ekenin aıtty.
Almatylyq oqýshy Sálim Kópeev Memleket basshysy Qasym-Jomart Toqaevqa ózi jasaǵan jumys ústeli organaızerin syıǵa tartty.
«Men kezdesýge de keshigip qaldym, dárethanada bolǵan edim. Mynaý sizge syılyq, ústelge arnalǵan organaızer. Parta ústi únemi mektep zattarymen bylyǵyp jatady. solarǵa alańdap, úlgermeı qalasyń. Ákem ekeýimiz barlyq synypqa arnalǵan osyndaı organaızerdiń jobasyn jasadyq. Ony ózim basyp shyǵardym», - dedi úshinshi synyp oqýshysy Sálim Kópeev.
Prezıdent jas ónertapqyshtyń syılyǵyn rızashylyqpen qabyldap, oǵan sáttilik tiledi.
«Jaqsy jumys istediń», - degen Qasym-Jomart Toqaev oqýshymen birge estelik sýretke tústi.