Memleket basshysynyń AQSh-qa sapary dıalogty keńeıtýge baǵyttalyp otyr - sarapshy
«Qazirgi ýaqytta AQSh bizdiń strategııalyq seriktesimiz bolyp tabylady. Ekijaqty jáne kópjaqty ózara qarym-qatynastyń barlyq baǵyttary boıynsha qaýyrt jumys júrgizilip jatyr. Buǵan qosa, halyqaralyq arenada Qazaqstan men Memleket basshysy Nursultan Nazarbaevtyń abyroıy artyp kele jatqandyqtan, bul qarym-qatynasty damytýdyń qajettiligi týyndap otyr. Resmı sapardyń maqsaty - dıalogty keńeıtý jáne tereńdetý arqyly strategııalyq seriktestikti jańa deńgeıge kóterý», - deıdi ol.
Dıplomattyń paıymdaýynsha, sapar qorytyndysy saýda-ekonomıkalyq seriktestiktiń damýyna tyń serpin bereri anyq.
«Búgingi tańda AQSh Qazaqstannyń iri saýda seriktesteriniń biri ári qazaqstandyq ekonomıkanyń iri ınvestory. Buǵan qosa amerıkalyq bıznes Qazaqstanmen bul baılanysty nyǵaıta túsýge múddelik tanytýda. Osyǵan baılanysty sapar barysynda ınnovatsııalyq-tehnologııalyq seriktestikti damytý boıynsha birqatar birlesken jobalarǵa qol qoıý josparlanǵan», - deıdi Qubashev.
Dıplomat buǵan qosa strategııalyq seriktestiktiń negizi bolatyn birsypyra baǵyttardy atady.
«Búgingi tańda ekijaqty yntymaqtastyq Qazaqstan Prezıdenti Nursultan Nazarbaev pen AQSh basshysy Donald Tramptyń 2017 jyldyń 1 qyrkúıegindegi telefon arqyly sóılesý kezindegi kelissózderi aıasynda órbip keledi. Sol tildesýden keıin strategııalyq seriktestiktiń basym baǵyttary retinde qaýipsizdik, ıadrolyq qarýsyzdandyrý, saýda-ekonomıkalyq jáne ınvestıtsııalyq seriktestik belgilengen bolatyn», - deıdi sarapshy.
Qubashev sonymen qatar, ekijaqty yntymaqtastyqty nyǵaıtýǵa sep bolatyn baǵyttar týraly aıtyp berdi.
«Jańǵyrtýǵa qatysty Qazaqstannyń aldyndaǵy mindetteri eskere otyryp aıtarym... Qazaqstandyq-amerıkalyq seriktestiktiń jelkenin AQSh-pen ekonomıkalyq baılanysty nyǵaıtý, startaptardy damytý úshin qajetti sharttardy ázirleý, ShOB-ty damytý jaǵyna burýda qyzyǵýshylyq tanytyp otyrmyz», - dep túıdi sózin sarapshy.