Memleket basshysy «Jetisý» saıabaǵyn aralap kórdi

ASTANA. QazAqparat - Memleket basshysy qaladaǵy jańa nysandarmen tanysý barysynda elordanyń 20 jyldyǵyna oraı Almaty oblysy qaıta jóndeýden ótkizgen «Jetisý» saıabaǵyna bardy, dep habarlaıdy Aqordanyń baspasóz qyzmeti.

Oblys ákimi A.Batalov Nursultan Nazarbaevqa saıabaqta Almaty oblysynyń kórnekti oryndarynyń bári kórinis tapqanyn aıtty. Onyń kire berisinde Jetisýdi beıneleıtin jeti arka, sýburqaqtary bar basty alleıa ornalasqan, sondaı-aq taý silemderiniń kórinisi jáne kıiz úıge uqsas oryn-jaılary bar «Aport» alańy, túrli jastaǵy balalarǵa arnalǵan «Tengrı» alańy, shaǵan alleıasy, «Tamǵaly tas» petroglıfteri beınelengen tastar jáne Sharyn shatqalynyń úlgisi bar.

Qazaqstan Prezıdenti men kórermender úshin sahnada Almaty oblysynyń tanymal ártisteri jáne etnomádenı ortalyqtarynyń ókilderi óner kórsetti.

Sharaǵa qatysýshylar aldynda sóz sóılegen Nursultan Nazarbaev Almaty oblysy Astananyń mereıtoıyna keremet saıabaq tartý etkenin jáne onyń elorda turǵyndarynyń súıikti demalys ornyna aınalatynyn atap ótti.

«Búginde barlyq oblystar kómek kórsetip, qoldaý bildirip jatyr. Óıtkeni, Astana - búkil Qazaqstannyń jetistigi. Bas qala qurylysyna óńirlerdiń bári atsalysty jáne qazir munda elimizdiń ár túkpirinen kelgen adamdar ómir súredi. Biz HHІ ǵasyrda ǵalamat dúnıeni birge jasadyq. Adamzat tarıhynda mundaı qalalar eshqashan 20 jyldyń ishinde salynbaǵan. Al, biz saldyq!» - dedi Qazaqstan Prezıdenti.

Nursultan Nazarbaev sóziniń sońynda oblys basshylyǵy men qurylysshylarǵa alǵys aıtty jáne sharaǵa qatysýshylardyń bárin aldaǵy elorda kúnimen quttyqtap, baq-bereke tiledi.

Sonymen qatar, Nursultan Nazarbaev qalanyń Almaty aýdanynda ornalasqan «Jeruıyq» saıabaǵyn aralap kórdi. Onda Elbasyǵa 19 jyl buryn ózi otyrǵyzǵan alǵashqy aǵash kórsetildi.