Memleket basshysy: Jasandy ıntellekt bolǵanda qazaq qalaı kún kóredi, osyny biz de oılanaıyq
"Entonı Kennıdiń «Batys fılosofııasynyń jańa tarıhy», Remı Hesstiń «Fılosofııanyń tańdaýly 25 kitaby» da tereń fılosofııalyq paıymdaýlarǵa jeteleıdi. Bolashaqta adamnyń sanadaǵy monopolııasy joqqa shyǵarylýy múmkin. Ǵalymdar 2050 jyly adamnyń barlyq zııatkerlik áleýetin basyp ozatyn jasandy ıntellekttiń qalyptasatynyna boljam jasaıdy. Adamzat tuńǵysh ret ózinen myqty qubylyspen betpe-bet keledi. Sonda ne isteımiz? Qalaı áreket etý kerek? Osyny biz de oılanaıyq. Bolashaqta jasandy ıntellektpen ne isteımiz? Sol kezde qazaq qalaı kún kóredi?", - dedi N.Nazarbaev búgin "100 jańa oqýlyqtyń" alǵashqy serııasyn tanystyrý kezinde.
Prezıdenttiń aıtýynsha, búginde jasandy ıntellektke daıyn bolý úshin álemniń úzdik oqý oryndary ózderiniń zertteý ortalyqtaryn ashyp jatyr. Oksfordta adam bolashaǵy, Garvardta bolashaq qoǵam atty fılosofııalyq jańa ınstıtýttar qurylýda. "Olar jańa ómirdiń paradıgmalaryn anyqtap, qaterlerdi aldyn alý máselesin oılanyp jatyr. Osynyń bári bizdiń rýxanı jańǵyrý qundylyqtarymyzben úndesedi. Bul aýdarmadan jasalǵan aýdarma emes. Adamzat sanasynyń eń tańdaýly týyndylary túpnusqadan qazaq tiline aýdarylyp otyr. Alǵash ret aǵylshyn tilinen tikeleı qazaq tiline aýdaryp jatyrmyz. Árıne, orys tilin bilý arqyly kóp nársege qol jekizdik. Ony da joqqa shyǵarýǵa bolmaıdy. Dúnıejúzilik mádenıetti de, tarıxty da, ǵylymdy da orys tili arqyly tanydyq. Onyń paıdasy zor boldy. Endi, tikeleı qazaq tiline aýdaryp otyrmyz", - dep atap kórsetti N.Nazarbaev.
Aıta keteıik, búgin atalǵan kitaptardyń barlyǵy Prezıdentke tanystyryldy. Sol kezde Memleket basshysy dinı bilimniń mańyzdylyǵyna da erekshe toqtaldy. Sondaı-aq, jemqorlyqtyń qaıdan bastalatynyn da aıtty.