Memleket basshysy jas mınıstrler týraly pikir bildirdi
«Men qoǵamda memlekettik apparattyń jumysyna qatysty biraz syn-pikirler bar ekenin bilemin. Olardyń basym kópshiligi oryndy. Qazirgi tańda biz memlekettik basqarý júıesin jańǵyrtý úshin naqty sharalar qabyldap jatyrmyz. Negizgi mindet – jergilikti ózin-ózi basqarýdy kúsheıtip, memlekettik qyzmetshilerge kóbirek derbestik berý. Budan bólek, aýdan jáne aýyl ákimderin saıladyq. Oblystyq máslıhattarǵa saılaý aralas júıe arqyly, al aýdan máslıhattaryna tek bir mandattyq qaǵıdat boıynsha ótedi. Aldaǵy jumys – aýqymdy. Biraz ýaqyt qajet ekeni túsinikti. Eń bastysy, biz memlekettik apparat ókilderiniń sana-sezimin ózgertýge basa mán berýimiz qajet. Olar týǵan-týystarynyń arasynda ne bolmasa qoǵamda abyroı-bedelge ıe bolýdy emes, eń aldymen, halyqqa, elge adal qyzmet etýdi maqsat tutýǵa tıis. «Adal azamat» degenimiz – osy», - dedi Qasym-Jomart Toqaev.
Sondaı-aq, Memleket basshysy jas kadrlardyń mınıstrlik deńgeıindegi laýazymdarǵa kelip jatqanyn eske saldy.
«Sońǵy kezderi men birqatar kadrlyq ózgerister jasadym. Bul rette, eshqandaı naýqanshyldyqqa, memlekettik qyzmetshilerdi, joǵary laýazymdy tulǵalardy jappaı qyzmetten bosatýǵa jol berilgen joq. Eń aldymen, olardyń iskerlik qabileti men tájirıbesi eskerildi. Sondaı-aq, jas, bilikti azamattar birqatar mańyzdy mınıstrliktiń tizginin ustady. Árıne, olardyń tájirıbesi, sonyń ishinde ómirlik tájirıbesi az ekeni sózsiz. Biraq, bul – ýaqytqa baılanysty másele. Bastysy, olardyń boıynda elimizdiń jarqyn bolashaǵy úshin adal qyzmet etýge qajetti bilim, erik-jiger bar», - dedi Prezıdent